تعلیم کا اولین مقصد انسانیت کی تعمیر ہے، خرم نواز گنڈا پور

اسلام ٹائمز۔ تحریک منہاج القرآن کی سنٹرل ورکنگ کونسل کا اجلاس مرکزی سیکرٹریٹ ماڈل ٹاؤن میں ناظم اعلیٰ خرم نواز گنڈاپور کی صدارت میں منعقد ہوا۔ سنٹرل ورکنگ کونسل کے اجلاس میں بریفننگ دیتے ہوئے وائس چانسلر منہاج یونیورسٹی ڈاکٹر ساجد محمود شہزاد نے کہا کہ منہاج یونیورسٹی میں تحقیق کو فروغ دیا جا رہا ہے اور طلبہ کی کردار سازی پر بھی خصوصی توجہ دی جاتی ہے۔ پاکستان کی ترقی و خوشحالی کا خواب غریب گھرانوں کے نوجوانوں کو زیور تعلیم سے آراستہ کر کے ہی پورا کیا جا سکتا ہے۔ طلبہ کی کردار سازی اور سماجی اقدار کا فروغ منہاج یونیورسٹی کی ترجیحات میں شامل ہیں۔ اس جدید دور میں تعلیم، ترقی پسند معاشرے کیلئے ریڑھ کی ہڈی کی حیثیت رکھتی ہے۔ منہاج یونیورسٹی لاہور تعلیم کے فروغ کے ذریعے ملک کی تقدیر بدلنے کیلئے کوشاں ہے

ڈاکٹر ساجد محمود شہزاد نے کہا کہ تعلیم کو ترجیح بنا کر ہی ہم درپیش معاشرتی اور معاشی چیلنجز سے نکل سکتے ہیں۔ تعلیم کے فروغ اور طلبہ کی کردار سازی کے حوالے سے منہاج یونیورسٹی کے کردار کو سراہا جا رہا ہے۔ منہاج یونیورسٹی تعلیم کی سہولیات کی فراہمی کیلئے بھرپور کوششیں کر رہی ہے۔ معاشرے میں حقیقی تبدیلی، شرح خواندگی میں اضافے پر منحصر ہے۔ ڈاکٹر ساجد محمود شہزاد نے کہا کہ ایک تعلیم یافتہ معاشرے میں خواتین کا کردار بنیادی اہمیت کا حامل ہوتا ہے۔ ناظم اعلیٰ خرم نواز گنڈاپور نے سنٹرل ورکنگ کونسل کے اجلاس سے خطاب کرتے ہوئے کہا کہ تعلیم کا اولین مقصد انسانیت کی تعمیر ہے۔ پاکستان میں تعلیم کے فروغ، طلبہ کی کردار سازی کیلئے منہاج یونیورسٹی اپنی مخلصانہ کوششوں کو بروئے کار لاتے ہوئے ایک عظیم قومی خدمت انجام دے رہی ہے۔ طلبہ کی بہترین تعلیمی رہنمائی کیساتھ ان کی کردار سازی بھی اعلیٰ تعلیم کے اہداف کا ماحصل ہے۔

منہاج یونیورسٹی نسل نو کو جدید علوم سے آراستہ کرتے ہوئے ایک بہترین قوم کی تعمیر کا خواب شرمندہ تعبیر کر رہی ہے۔ سنٹرل ورکنگ کونسل کے اجلاس میں بریگیڈئیر (ر) اقبال احمد خان، جی ایم ملک، خرم شہزاد، ڈاکٹر شاہد نفیس، راجہ زاہد محمود، سید امجد علی شاہ، غلام مرتضیٰ علوی، رانا نفیس قادری، اشتیاق حنیف مغل، سدرہ کرامت، عائشہ مبشر، حاجی محمد اسحاق، حاجی منظور حسین، عارف چودھری، سرفراز خان و دیگر رہنماؤں نے شرکت کی۔