اسلام ٹائمز۔ سندھ بھر میں ایک بار پھر کورونا کیسز میں اضافہ ہو رہا ہے اور کورونا کا علاج کرنے والے ڈاکٹر خود اس وائرس کا شکار ہو رہے ہیں۔ ذرائع کے مطابق کورونا وائرس نے ایک اور ڈاکٹر کی جان لے لی، ڈاؤ یونیورسٹی کے ڈاکٹر فیروز کورونا سے لڑتے ہوئے زندگی کی بازی ہار گئے۔ تفصیلات کے مطابق ڈاؤ یونیورسٹی کے شعبہ بےہوشی کے انچارج ڈاکٹر فیروز 5 دن سے زیرعلاج تھے، وہ انتہائی نگہداشت وارڈ میں ایڈمٹ تھے۔ پاکستان میڈیکل ایسوسی ایشن کے مطابق سندھ میں 69 ڈاکٹرز کورونا سے متاثر ہوکر انتقال کر چکے ہیں جب کہ ملک بھر میں 209 ڈاکٹر کورونا کے باعث انتقال کرچکے ہیں۔ پاکستان میڈیکل ایسوسی ایشن کے جنرل سیکرٹری ڈاکٹر قیصر سجاد کا کہنا ہے کہ کورونا کی موجودہ صورتحال تشویشناک ہے، بھارتی وائرس انتہائی خطرناک ہے تمام افراد احتیاط اپنائیں۔