اسلام ٹائمز - کورونا کیسز بڑھے تو دوبارہ جزوی لاک ڈاؤن لگے گا، ناصر حسین شاہ

کورونا کیسز بڑھے تو دوبارہ جزوی لاک ڈاؤن لگے گا، ناصر حسین شاہ

نجی ٹی وی سے گفتگو کرتے ہوئے سندھ کے صوبائی وزیر نے کہا کہ محرم کے لئے سندھ حکومت اور وفاق سے ایس او پیز کا نوٹیفکیشن جاری ہوچکا ہے، انڈور مجالس کی اجازت ہے تاہم فاصلے اور ماسک پہننا لازم ہوگا۔

اسلام ٹائمز۔ پاکستان پیپلز پارٹی کے رہنما اور سندھ کے صوبائی وزیر سید ناصر حسین شاہ کا کہنا ہے کہ لاک ڈاؤن سے کورونا کیسز میں کمی آئی ہے، ہمیں سپورٹ کرنے کے بجائے تنقید کی جاتی ہے۔ نجی ٹی وی سے گفتگو کرتے ہوئے ناصر حسین شاہ نے کہا کہ ایس او پیز پر عمل نہ ہوا اور کیسز بڑھے تو دوبارہ جزوی لاک ڈاؤن لگے گا۔ ناصر حسین شاہ نے کہا کہ جو فیصلے کئے این سی او کی تجاویز کو مد نظر رکھ کر کئے، ضرورت محسوس ہوئی تو زیادہ سخت لاک ڈاؤن لگائیں گے۔ انہوں نے کہا کہ ایس اوپیز پر باقاعدہ عمل درآمد کروانا ہمیں بہت مشکل ہوا، لوگوں کو اکسایا گیا۔ ناصر حسین شاہ نے کہا کہ محرم کے لئے سندھ حکومت اور وفاق سے ایس او پیز کا نوٹیفکیشن جاری ہوچکا ہے، انڈور مجالس کی اجازت ہے تاہم فاصلے اور ماسک پہننا لازم ہوگا۔