عراق، امریکی فوج کا لاجسٹک قافلہ بم حملے کا شکار

اسلام ٹائمز۔ عراق میں غیرقانونی طور پر قابض امریکی فوج کا ایک اور قافلہ بم حملے کا شکار ہو کر تباہ ہو گیا ہے۔ تفصیلات کے مطابق امریکی فوج کا یہ لاجسٹک قافلہ صوبہ الديوانيہ میں سڑک کنارے نصب بم سے ٹکرایا جس سے فوجی قافلے میں موجود متعدد امریکی گاڑیاں حساس فوجی سازوسامان سمیت جل کر راکھ ہو گئیں۔ اس بم حملے کی ذمہ داری تاحال کسی مزاحمتی گروہ نے قبول نہیں کی تاہم عراقی مزاحمت نے اعلان کر رکھا ہے کہ ملک سے امریکی افواج کے مکمل انخلاء تک امریکی فوج پر حملے جاری رہیں گے۔ واضح رہے کہ کویت کے ساتھ ملحقہ عراقی سرحدی گذرگاہ جریشان، جس پر بغداد کا کوئی کنٹرول نہیں، سے ہلکے و بھاری فوجی اسلحے و عسکری سازوسامان پر مشتمل امریکی فوج کے لاجسٹک قافلے گاہے بگاہے کویت سے عراق میں داخل ہوتے رہتے ہیں جنہیں عراقی مزاحمتی گروہوں کی جانب سے نشانہ بنا دیا جاتا ہے۔