اسلام ٹائمز - کراچی میں انتہائی مطلوب ٹارگٹ کلر کی خودکشی

ایس ایس پی ویسٹ کا کہنا ہے کہ انتہائی مطلوب ٹارگٹ کلر شاہین بہاری نے گرفتاری کے خوف سے خودکشی کی ہے، پولیس کو جائے وقوع سے ایک پستول اور خودکشی سے پہلے لکھا خط بھی ملا ہے۔

اسلام ٹائمز۔ شہر قائد کے علاقے اورنگی ٹاؤن میں انتہائی مطلوب ٹارگٹ کلر شاہین بہاری نے گرفتاری کے خوف سے مبینہ طور پر خودکشی کرلی۔ تفصیلات کے مطابق کراچی کے علاقے اورنگی ٹاؤن منصور میں فائرنگ کا واقعہ پیش آیا۔ ہلاک ہونے والے شخص کی شناخت مبینہ ٹارگٹ کلر شاہین بہاری کے نام سے کی گئی۔ ایس ایس پی ویسٹ کا کہنا ہے کہ انتہائی مطلوب ٹارگٹ کلر شاہین بہاری نے گرفتاری کے خوف سے خودکشی کی ہے، پولیس کو جائے وقوع سے ایک پستول اور خودکشی سے پہلے لکھا خط بھی ملا ہے۔

خط میں شاہین بہاری نے لکھا ہے کہ وہ پولیس چھاپوں سے پریشان و تنگ ہو کر خودکشی کر رہا ہے۔ ایس ایس پی ویسٹ کے مطابق شاہین بہاری نے اپنے ساتھی آصف بھیا کے ہمراہ 28 اگست کو ہوٹل میں فائرنگ کرکے اے ایس آئی اکرم خان کو شہید کیا تھا، شاہین بہاری نے خط میں لکھا کہ جس پستول سے اے ایس آئی کو شہید کیا، وہ پستول پھینک دیا تھا، دوسرے پستول سے خودکشی کر رہا ہوں۔