QR Code
بارش کے ایک جھونکے نے سندھ حکومت کی 13 سالہ کارکردگی کا پول کھول دیا، جلال محمود شاہ
23 Sep 2021 23:35
اپنے ایک بیان میں سندھ یونائیٹیڈ پارٹی کے سربراہ نے کہا کہ مون سون سے نمٹنے اور شہریوں کو سیوریج کی سہولتوں کی فراہمی کے نام پر کروڑوں روپے خرچ کیے جاتے ہیں، مگر ایک بارش ان ترقیاتی منصوبوں کا پول کھول دیتی ہے۔
اسلام ٹائمز۔ سندھ یونائیٹیڈ پارٹی کے سربراہ و سندھ ایکشن کمیٹی کے کنوینر سید جلال محمود شاہ نے کہا ہے کہ کراچی میں بارش کے ایک جھونکے نے سندھ حکومت کی مسلسل 13 سالہ کارکردگی کا پول کھول دیا ہے، سندھ حکومت کی کرپشن بارش کے پانی میں تیرتی ہوئے نظر آ رہی ہے۔ اپنے ایک بیان میں جلال محمود شاہ نے کہا کہ سندھ حکومت کی کرپشن سے توجہ ہٹتی تو وہ سندھ کیلئے کچھ کرتی، سندھ حکومت کی ساری مشینری زمینوں پر قبضے اور سیاسی مخالفین کی پکڑ دھکڑ اور انہیں ہراساں کرنے میں مصروف ہے۔ انہوں نے کہا کہ مون سون سے نمٹنے اور شہریوں کو سیوریج کی سہولتوں کی فراہمی کے نام پر کروڑوں روپے خرچ کیے جاتے ہیں، مگر ایک بارش ان ترقیاتی منصوبوں کا پول کھول دیتی ہے۔ انہوں نے کہا کہ سندھ حکومت صوبہ کے عوام کو صاف پانی فراہم کر سکی اور نہ ہی بارش کے پانی کے نکاس کا کوئی سسٹم دے سکی ہے۔
خبر کا کوڈ: 955422