اسلام ٹائمز۔ شیعہ علماء کونسل پاکستان کے قائد علامہ سید ساجد علی نقوی نے کہا ہے کہ آج کل نوجوانوں میں اخلاقیات کی بہت گراوٹ ہے، اصحاب کہف کے لیے قرآن میں جو لفظ استعمال ہوا ہے اسکا ترجمہ نوخیز ہے، ابھی وہ نوجوان ہیں ایسے تو انسان چالیس سال تک جوان کہلاتا ہے لیکن وہ اصحاب نوخیز تھے، پھر بھی انہوں نے اخلاقیات کی وجہ سے یہ مقام پایا۔ ان خیالات کا اظہار انہوں نے آزاد کشمیر سے آئے نوجوان طلباء کے ایک وفد سے گفتگو کرتے ہوئے کیا۔ انہوں نے کہا کہ اگر بات مثبت ہو تو اسکا ضرور جواب دیں، مگر شائستگی سے اور اخلاقیات کے دائرے میں رہتے ہوئے، مگر جواب دینے سے پہلے دفتر سے رہنمائی ضرور لیں۔ انہوں نے مثبت انداز میں اپنی توانائیاں مذہب اور تنظیم کے لیے وقف کرنے کی طرف بھی نوجوانوں کی توجہ مبذول کرائی۔ وفد میں حمید عباس، علی جواد موسوی اور شہریار علی شامل تھے۔