بھارت کابل میں سفارت خانہ دوبارہ کھولے اور پاکستان میں ہائی کمشنر بھیجے، منی شنکر ائیر

اسلام ٹائمز۔ کانگریس کے سینئر لیڈر اور بھارت کے سابق وزیر خارجہ منی شنکر ایئر نے کہا ہے کہ بھارت کو کابل میں سفارت خانہ دوبارہ کھول کر اور ہائی کمشنر کو پاکستان بھیج کر افغانستان کے ساتھ بات چیت کرنے کی ضرورت ہے۔ ان کا کہنا ہے کہ کابل جانے والی سڑک پاکستان سے گزرتی ہے اور اسی لئے بھارت کو افغانستان کے لوگوں سے بات کرنی چاہیئے۔ یہ پوچھے جانے پر کہ کیا ہندوستان کو کشمیر کے مقابلے میں افغانستان میں طالبان کے اقتدار میں آنے کے بارے میں خوفزدہ ہونے کی ضرورت ہے منی شنکر ایئر نے کہا کہ میں سمجھتا ہوں کہ یہ بہت بدقسمتی کی بات ہے کہ ہمارے پاس یہ جاننے کا کوئی ذریعہ نہیں ہے۔ انہوں نے کہا کہ افغانستان میں کیا ہو رہا ہے اور اس کے بارے میں سفارتی معلومات کا کوئی ذریعہ نہیں ہے، ہم یہ بھی نہیں جان پارہے ہیں کہ وہاں کون سے مسائل کا اظہار کیا جا رہا ہے اور ہمیں کن پر توجہ دینی چاہیئے اور کس کو نظر انداز کرنا چاہیئے۔

انہوں نے کہا کہ ہمیں اس مکالمے کے عمل میں شامل ہونا ہے اور وہ ہے سفارت کاری، اس لئے میں سمجھتا ہوں کہ یہ انتہائی بدقسمتی ہے کہ اسلام آباد میں ہماری نمائندگی بہت کم ہے اور کابل میں ہماری کوئی نمائندگی نہیں ہے۔ منی شنکر ایئر نے کہا کہ ہندوستان کی حقیقت کو دیکھتے ہوئے، تعلیم یافتہ ہونا یہاں سب سے اہم چیز ہے۔ بھارت کی سیاست کس سمت میں جا رہی ہے کے بارے میں پوچھے جانے پر انہوں نے کہا کہ بدقسمتی سے پارلیمنٹ مظاہرے کے ایک اسٹیج میں تبدیل ہو رہی ہے نہ کہ بحث کا فورم میں۔ انہوں نے کہا کہ اگر اس قسم کی رکاوٹیں ہماری جمہوریت کی پہچان بنی رہیں تو میرے خیال میں ہم بہت غلط سمت میں جا رہے ہیں۔

اس سوال کے جواب میں کہ کیا ہندوستانی سیاست اب ’تقسیم کرو اور حکومت کرو‘ پر انحصار کر رہی ہے، منی شنکر یئر نے کہا کہ یہ ان پارٹیوں کی سیاست نہیں ہے جو اپوزیشن میں ہیں، یہ اقتدار میں رہنے والوں کی سیاست ہے۔ انہوں نے کہا کہ اس لئے میں اس بات سے اتفاق کرتا ہوں کہ اس کا تعلق ملک کی آدھی آبادی سے ہے لیکن میں ملک کے دوسرے آدھے سے متفق نہیں ہوں۔ قابل ذکر بات یہ ہے کہ منی شنکر ایئر کراچی، پاکستان میں پہلے ہندوستانی قونصل جنرل تھے اور انہوں نے تین لاکھ پاکستانیوں کو بھارت آنے کے لئے ویزے جاری کئے تھے۔