مفتی گلزار حسین نعیمی کو ''عشق پیغمبر اعظم مرکز وحدت مسلمین'' کانفرنس میں شرکت کی دعوت 

اسلام ٹائمز۔ مجلس وحدت مسلمین پاکستان کے مرکزی سیکرٹری سیاسیات سید اسد عباس نقوی نے اسلام آباد میں جماعت اہل حرم پاکستان کے سربراہ مفتی گلزار نعیمی سے ملاقات کی۔ اس موقع پر ایم ڈبلیو ایم کے مرکزی ڈپٹی سیکرٹری جنرل سید ناصر عباس شیرازی، مرکزی رہنماء ایم ڈبلیو ایم ایڈووکیٹ آصف رضا ایڈووکیٹ سمیت دیگر رہنماء بھی موجود تھے۔ ملاقات میں ماہ ربیع الاول میں مجلس وحدت مسلمین کے زیراہتمام اور ملی یکجہتی کونسل کی جانب سے منعقد ہونے والی عظیم الشان ''عشق پیغمبر اعظم مرکز وحدت مسلمین'' کانفرنس میں شرکت کی دعوت اور انتظامات کے حوالے سے مختلف امور پر تبادلہ خیال کیا گیا۔

واضح رہے کہ ملی یکجہتی کونسل پاکستان کی جانب سے مجلس وحدت مسلمین پاکستان کی میزبانی میں 24 اکتوبر کو کنونشن سنٹر اسلام آباد میں ''عشق پیغمبر اعظم مرکز وحدت مسلمین'' کے عنوان سے کانفرنس کا انعقاد کیا جا رہا ہے، جس میں ملی یکجہتی کونسل میں شامل 30 سے زائد جماعتوں کو شرکت کی دعوت دی جا رہی ہے۔