اسلام ٹائمز۔ متحدہ قومی مومنٹ پاکستان کے سینئر ڈپٹی کنوینر عامر خان نے مہینے میں دوسری بار پیٹرولیم مصنوعات کی قیمتوں میں اضافے کی اطلاعات پر تشویش کا اظہار کرتے ہوئے کہا ہے کہ پاکستان میں پہلے ہی مہنگائی نے غریب عوام کی کمر توڑ رکھی ہے، حکومتی اقدامات عوام کی فلاح و بہبود کیلئے صرف ہونے چاہیے، نہ کہ ان کو مزید مشکلات کی طرف دکھیلنے میں صرف ہوں۔ عامر خان نے مزید کہا کہ پیٹرول مصنوعات کی قیمت پر اس قدر اضافہ عوام دشمنی کے مترادف ہے، لہٰذا ہم وزیراعظم عمران خان سے درخواست کرتے ہیں کہ پیٹرولیم مصنوعات کی قیمتوں میں کسی بھی قسم کے اضافے سے گریز کریں۔