QR Code

سراج الحق کی قطر میں افغانستان کے وزیر پٹرولیم سے ملاقات، افغانستان کی صورتحال پر تبادلہ خیال 

26 Nov 2021 12:19

جماعت اسلامی کے امیر نے کہا کہ جنگ زدہ ملک میں انفراسٹرکچر کی بحالی کے لیے بھی بہت زیادہ فنڈز کی ضرورت ہے جس کے لیے عالمی طاقتوں اور مسلمان ممالک کو خصوصی طور پر افغانستان کی مدد کرنی چاہیے، مسلمان ممالک افغانستان میں طالبان حکومت کو تسلیم کریں۔

اسلام ٹائمز۔ امیر جماعت اسلامی سراج الحق نے قطر کے دارالحکومت دوحہ میں افغانستان کے وزیرپٹرولیم اور مذکراتی ٹیم کے رکن ملا شہاب الدین دلاور سے ملاقات کی، جس میں دونوں رہنماوں نے افغانستان کی صورتحال اور دوطرفہ تعلقات پر تبادلہ خیال کیا۔ طالبان کے دوحہ آفس میں ہونے والی ملاقات کے دوران ترجمان ڈاکٹر محمد نعیم اور جماعت اسلامی کے ڈائریکٹر امور خارجہ آصف لقمان قاضی بھی موجود تھے۔ سراج الحق نے اس خواہش کا اظہار کیا کہ افغانستان میں امن ہو اور ملک افغان عوام کی مرضی کے مطابق آگے بڑھے۔ انھوں نے کہا کہ ایسا افغانستان وجود میں آئے جس کی خاطر لاکھوں افغان عوام نے قربانیاں دیں، صعوبتیں اور مشکلات برداشت کیں۔ امیر جماعت نے امت مسلمہ کے اتحاد کی ضرورت پر زور دیا۔ انھوں نے کہا کہ اسلامی دنیا کو درپیش مسائل کا حل باہمی اتفاق و محبت میں ہے۔

انھوں نے کہا کہ افغانستان میں لاکھوں لوگوں کو خوراک کی ضرورت ہے اور وہ نامساعد حالات کی وجہ سے مشکل زندگی گزار رہے ہیں۔ جنگ زدہ ملک میں انفراسٹرکچر کی بحالی کے لیے بھی بہت زیادہ فنڈز کی ضرورت ہے جس کے لیے عالمی طاقتوں اور مسلمان ممالک کو خصوصی طور پر افغانستان کی مدد کرنی چاہیے۔ انھوں نے کہا کہ مسلمان ممالک افغانستان میں طالبان حکومت کو تسلیم کریں۔ اس موقع پر وزیر پٹرولیم ملا شہاب الدین نے گفتگو کرتے ہوئے پاکستان اور ان تمام لوگوں کا شکریہ ادا کیا جنھوں نے مشکل وقت میں ان کا ساتھ دیا۔ امیر جماعت پانچ روزہ دورہ پر قطر میں ہیں جہاں ان کی مسلم دنیا کے نامور علما، تنظیموں اور اہم سماجی و سیاسی شخصیات سے ملاقاتیں ہو رہی ہیں۔ 

خبر کا کوڈ: 965523