اسلام ٹائمز۔ وزیر اعلیٰ گلگت بلتستان خالد خورشید نے کہا ہے کہ ہماری حکومت عوامی مینڈیٹ کی مکمل پاسدار ہے، عوام کے ہر دیرینہ مسئلے کے حل کیلئے بھرپور اقدامات اٹھائے جائیں گے۔ لینڈ ریفارمز کمیشن کی تشکیل ہی عوامی امنگوں کی ترجمان ہے، جس کا باقاعدہ نوٹیفکیشن بھی جاری ہو چکا ہے۔ سکردو میں ذرائع ابلاغ کے نمائندوں سے گفتگو کرتے ہوئےان کا کہنا تھا کہ لینڈ مافیا کے خلاف سخت سے سخت فیصلے کرنے جا رہے ہیں۔ عوام کی زمینیں ہتھیانے والوں کو ڈھونڈ ڈھونڈ کر پکڑیں گے۔ انہوں نے مزید کہا کہ صوبائی حکومت ایک ایک انچ اراضی کی محافظ ہے۔ ہم گلگت بلتستان کی زمینوں کو مافیاز کے رحم و کرم پر نہیں چھوڑیں گے۔