آصف ‏زرداری کا نواز شریف کے بارے میں بیان افسوس ناک ہے، شہباز شریف

اسلام ٹائمز۔ مسلم لیگ نون کے صدر اور قومی اسمبلی میں قائد حزب اختلاف شہباز شریف نے نواز شریف کے بارے میں آصف ‏زرداری کے بیان کو افسوس ناک قرار دے دیا۔ شہباز شریف نے پاکستان پیپلز پارٹی کے شریک چیئرمین آصف زرداری کے بیان پر ٹویٹ کرتے ہوئے کہا کہ ‏زرداری صاحب کا نواز شریف کے بارے میں بیان افسوس ناک ہے، ‏میاں صاحب کی پاکستان کے ساتھ غیر متزلزل وابستگی ہمیشہ ناقابل تردید رہی ہے، ‏نواز شریف کو کن حالات میں بیرون ملک جانا پڑا آپ جانتے ہیں۔ شہباز شریف کا کہنا تھا کہ  ‏ہمیں ایسے ریمارکس سے گریز کرنا چاہیے اور ‏سب کو مل کر ملک کی بہتری کے لیے کام کرنا چاہیے۔ واضح رہے کہ لاہور میں حلقہ این اے 133 کے ضمنی انتخابات میں زیادہ ووٹ حاصل کرنے کی خوشی میں 6 دسمبر کو تقریب سے خطاب کرتے ہوئے  آصف علی زرداری نے نون لیگ پر تنقید کرتے ہوئے کہا تھا کہ اپنے ان سیاسی مخالفین سے ہر جگہ لڑیں گے جو پاکستان مخالف ہیں، جو اس دھرتی میں نہیں مرنا چاہتا اس کا یہاں کیا ہے؟، دنیا پاکستان کو توڑنا چاہتی ہے مگر ہم بچائیں گے۔