QR Code

برادر اقوام کے درمیان کسی قسم کا انتشار پیدا نہ ہونے دیں، ارباب لیاقت علی ہزارہ

13 Dec 2021 10:46

اپنے ایک بیان میں کوئٹہ اصلاحی کمیٹی کے رکن اور ایم ڈبلیو ایم کوئٹہ کے جنرل سیکرٹری نے قوم کو صبر و تحمل سے کام لینے اور منفی سرگرمیوں سے گریز کرنے کی تلقین کی ہے۔

اسلام ٹائمز۔ کوئٹہ اصلاحی کمیٹی کے بنیادی رکن اور مجلس وحدت مسلمین کوئٹہ کے جنرل سیکرٹری ارباب لیاقت علی ہزارہ نے اپنے بیان میں قوم کے جوانوں، بزرگوں، ماؤں اور بہنوں کو صبر و تحمل کی تلقین کرتے ہوئے کہا ہے کہ انشاء اللہ ہدایت خلجی کو کیفر کردار تک ضرور پہنچائیں گے۔ قوم کے جوان شعور کا دامن نہ چھوڑے اور کسی بھی طرح قانون ہاتھ میں نہ لیں۔ انہوں نے کوئٹہ میں امن کی فضاء برقرار رکھنے کی درخواست کرتے ہوئے کہا ہے کہ ہدایت خلجی کی خاطر برادر اقوام کے درمیان کسی قسم کا انتشار پیدا نہ ہونے دیں، نہ ہی ملزم کے گھر کو نشانہ بنائیں۔ انہوں نے کہا کہ دیگر اقوام سے تعلق رکھنے والے غریب افراد جو علاقے میں سبزی فروشی اور پھل فروخت کرنے کیلئے آتے ہیں، انہیں کسی قسم کی تکلیف نہ پہنچنے دیں۔ جرم میں ہدایت خلجی شریک ہے، جسکی سزا اسے اور اسکے ساتھیوں کو ملنی چاہئے۔ انہوں نے کہا کہ صبر و تحمل کا دامن تھام کر رکھنا ہمارے لئے بے حد ضروری ہے۔ قوم کے افراد کسی قسم کی منفی سرگرمی کی حوصلہ افزائی نہ کریں اور نہ ہی انکا حصہ بنیں۔ ارباب لیاقت ہزارہ نے کہا کہ کوئٹہ اصلاحی کمیٹی میں شہر کے علماء، سیاسی جماعتوں اور دیگر عمائدین کی نمائندگی موجود ہے، قوم ہم پر اعتماد رکھیں۔ ہدایت خلجی اور اسکے ساتھیوں کو سزا دلوائیں گے۔ انہوں نے کہا کہ وقت کے ساتھ ساتھ ہم قوم کو کیس کے حوالے سے آگاہ بھی کرتے رہیں گے۔

خبر کا کوڈ: 968227