اسلام ٹائمز - اللہ تعالیٰ حرمین شریفین کو دین سے محبت کرنیوالے رکھوالے عطا فرمائے، معاویہ اعظم

تبلیغی جماعت پر سعودی عرب میں پابندی کی مذمت اور افسوس کا اظہار

اللہ تعالیٰ حرمین شریفین کو دین سے محبت کرنیوالے رکھوالے عطا فرمائے، معاویہ اعظم

اپنے ایک ویڈیو پیغام میں کالعدم جماعت کے رکن پنجاب اسمبلی کا کہنا ہے کہ مکہ و مدینہ قرآن و وحی کی سرزمین ہے، جہاں سے قرآن کا پیغام پور دنیا میں پھیلا، وہاں تبلیغی جماعت والوں پر پابندی لگنا افسوسناک ہے اور سعودی حکومت کے اس اقدام سے دین سے محبت کرنیوالوں کے دل پر گہرا زخم آیا ہے۔

اسلام ٹائمز۔ کالعدم سپاہ صحابہ پاکستان کے رکن پنجاب اسمبلی معاویہ اعظم طارق نے سعودی عرب کی جانب سے تبلیغی جماعت پر پابندی پر گہرے دکھ اور افسوس کا اظہار کر دیا۔ اپنے ویڈیو پیغام میں معاویہ اعظم کا کہنا ہے کہ تبلیغی جماعت کا نام سامنے آتے ہی ذہن میں محبت پھیلانے والے، دین کی دعوت دینے والے، دروازوں پر جا کر لوگوں کی آخرت کی فکر کرنیوالے لوگوں کا خیال آتا ہے۔ انہوں نے کہا کہ ان پر پابندی لگے تو امریکہ و یورپ میں لگے، دین دشمنوں کے ممالک میں پابندی لگے، مگر یہ کیا ہوگیا کہ سعودی عرب میں اِن پر پابندی لگ گئی۔ انہوں نے کہا کہ مکہ و مدینہ قرآن و وحی کی سرزمین ہے، جہاں سے قرآن کا پیغام پوری دنیا میں پھیلا، وہاں تبلیغی جماعت والوں پر پابندی لگنا افسوسناک ہے۔

سعودی حکومت کے اس اقدام سے دین سے محبت کرنیوالوں کے دل پر گہرا زخم آیا ہے، لیکن اس زخم پر بہت زیادہ تعجب بھی نہیں۔ اس کی وجہ سامنے ہے کہ جدہ میں دنیا کا سب سے بڑا سینما کھول دیا گیا، انڈیا اور امریکہ کے اداکار وہ مناظر دکھاتے نظر آئے، جس میں انہوں نے عجیب و غریب پرفارمنس پیش کی، پھر ہم نے دیکھا چست لباس پہنے خواتین کو حرمین شریفین کی سکیورٹی پر تعینات کر دیا گیا، اس طرح کے فیصلوں کے بعد توقع تھی کہ ایسا ہی ہوگا۔ انہوں نے کہا کہ اب آنیوالے وقت میں امت کیلئے تکلیف دہ بات ہوسکتی ہے، جو حرمین کی حفاظت کا مسئلہ ہے، اللہ تعالیٰ حرمین کو ایسے رکھوالے عطا فرمائے، جو دین سے محبت کرنیوالے ہوں۔