QR Code

غاصب صیہونیوں نے گذشتہ 21 سال میں 2000 فلسطینی بچوں کی جان لی ہے، خالد قزمار

18 Dec 2021 23:00

عبری زبان کے ای مجلے میں چھپنے والے اپنے مقالے میں فلسطینی بچوں کے حقوق کی عالمی تنظیم الحرکہ العالمیہ للدفاع عن الاطفال کے سیکرٹری جنرل نے انکشاف کیا ہے کہ غاصب صیہونی رژیم نے سال 2000ء سے ابتک 2 ہزار فلسطینی بچوں کا ناحق قتل کیا ہے

اسلام ٹائمز۔ فلسطینی بچوں کے حقوق کی عالمی تنظیم الحرکہ العالمیہ للدفاع عن الاطفال کے سربراہ نے عبری زبان کے ای مجلے سبحا مکومیت میں چھپنے والے اپنے تازہ کالم میں انکشاف کیا ہے کہ غاصب صیہونیوں نے سال 2000ء کے بعد سے 2 ہزار بے گناہ فلسطینی بچوں کی جان لی ہے۔ خالد قزمار نے لکھا کہ اس مدت میں سال 2021ء فلسطینی بچوں کے لئے انتہائی مہلک ثابت ہوا کیونکہ اس کے دوران غاصب صیہونی فوجیوں اور یہودی آبادکاروں نے پورے مغربی کنارے، قدس شریف اور غزہ میں 86 فلسطینی بچوں کو قتل کیا تھا۔ انہوں نے لکھا کہ علاوہ ازیں حالیہ 12 روزہ جنگ کے دوران صیہونی بمباری میں 67 جبکہ جاری سال کے دوران مغربی کنارے و قدس شریف میں غاصب صہیونیوں کی سیدھی فائرنگ کے نتیجے میں 15 اور غاصب صیہونی آبادکاروں کے ہاتھوں 2 فلسطینی بچے بھی شہید ہوئے ہیں۔ اس مقالے میں تاکید کی گئی ہے کہ غاصب صیہونیوں کی جانب سے خصوصا فلسطینی بچوں کی جانب مار ڈالنے کی نیت سے فائرنگ کی جاتی ہے جبکہ اس قتل عام کے خلاف "ماورائے قانون قتل" کے حوالے سے عالمی عدالتوں میں قانونی کارروائی بھی عمل میں لائی جا سکتی ہے۔ خالد قزمار نے اپنے کالم کے آخر میں 17 سالہ فلسطینی نوجوان عبداللہ جوابرہ، جسے اسرائیلی فوجیوں کی جانب سے بارہا گرفتار کئے جانے کے بعد بالآخر سیدھی فائرنگ کر کے موقع پر شہید کر دیا گیا تھا، کی شہادت کی جانب اشارہ کرتے ہوئے تاکید کی کہ غاصب صیہونی حکام اس جیسے انسانیت سوز جرائم پر اپنے گماشتوں کے خلاف قانونی کارروائی کرنے کے بجائے انسانی حقوق کی تنظیموں کا منہ بند کرنے کی کوشش میں ہی لگی رہتی ہے۔

خبر کا کوڈ: 969180