سعودی شاہی رژیم کمسن نوجوانوں کو سزائے موت نہ دینیکے وعدوں پر عمل نہیں کر رہی، انسانی حقوق کی تنظیم

اسلام ٹائمز۔ حجاز میں سرگرم انسانی حقوق کی تنظیم "یورپی سعودی تنظیم ESOHR" نے اپنے ایک بیان میں تاکید کی ہے کہ سعودی شاہی رژیم تاحال کمسن نوجوانوں کو سزائے موت دے رہی ہے۔ ٹوئٹر پر جاری ہونے والے اپنے ایک بیان میں انسانی حقوق کی تنظیم کا لکھنا تھا کہ کمسن نوجوانوں کے خلاف سزائے موت کے خاتمے کے بارہا وعدوں کے باوجود سعودی شاہی رژیم کی جانب سے متعدد بار ان وعدوں کی خلاف ورزی کی گئی ہے۔ اس تنظیم نے لکھا کہ سعودی شاہی رژیم نے سلمان بن عبدالعزیز اور اس کے ولیعہد کے دورے میں کم از کم 12 کمسن نوجوانوں کی سزائے موت پر عملدرآمد کیا ہے جن میں سے آخری مصطفی الدرویش ہے جس کی سزائے موت پر جولائی 2021ء میں عملدرآمد کیا گیا۔