تباہی سرکار کا منشور اور دعوے جھوٹ پر مبنی ہیں، شیری رحمان

اسلام ٹائمز۔ پیپلز پارٹی کی نائب صدر اور مرکزی رہنماء شیری رحمان کا میڈیا سے گفتگو کرتے ہوئے کہنا تھا کہ منی بجٹ کی شکل میں عوام پر ایک اور بم گرایا گیا ہے۔ سینیٹر شیری رحمان نے حکومت کے متضاد بیانات کو اپنی تنقید کا نشانہ بناتے ہوئے کہا کہ دو ماہ پہلے وزیراعظم نے 150 ارب کی سبسڈی کا اعلان کیا تھا، اب حکومت کہتی ہے کہ منی بجٹ سے غریب پر صرف 200 ارب کا بوجھ پڑے گا۔ شیری رحمان کا یہ بھی کہنا تھا کہ منی بجٹ سے 150 سے زائد اشیاء کی قیمتوں میں براہ راست اضافہ ہوگا، عوام ان نااہل حکمرانوں کے چہروں کو یاد رکھے، جو ان پر مہنگائی کے بم گرا رہے ہیں۔ مہنگائی کرنے سے بنی گالا پر اثر نہیں پڑے گا، البتہ عوام پر ضرور اثر پڑے گا، عوام ان نااہل حکمرانوں کے چہروں کو یاد رکھے، جو ان پر مہنگائی کے بم گرا رہے ہیں، منی بجٹ اور نااہل سرکار ہمیں نامنظور ہے۔