اسلام ٹائمز۔ پاکستان پیپلز پارٹی کے چیئرمین بلاول بھٹو زرداری نے کوئٹہ میں دھماکے کی شدید الفاظ میں مذمت کی ہے۔ بلاول ہاؤس میڈیا سیل جاری بیان میں پی پی پی چیئرمین نے دھماکے میں معصوم شہریوں کی شہادت پر افسوس کا اظہارکیا۔ انہوں نے کہا کہ دہشتگرد کسی بھی شکل میں ہوں، ان سے آہنی ہاتھوں سے نمٹنا قومی فریضہ ہے۔ بلاول بھٹو زرداری نے کہا کہ دہشتگردی میں اپنے پیاروں کو کھونے کا درد میں سمجھ سکتا ہوں، متاثرہ خاندانوں کے دکھ میں برابر کا شریک ہوں۔ انہوں نے کہا کہ دھماکے کے زخمیوں کے بہتر علاج معالجے کو یقینی بنایا جائے۔ بلاول بھٹو زرداری نے دھماکے کے زخمیوں کے جلد صحتیابی کی دعا بھی کی ہے۔