بھارت میں کورونا سے کہرام، ایک دن میں 1 لاکھ 41 ہزار سے زائد نئے کیسز

اسلام ٹائمز۔ بھارت میں کورونا وائرس کے معاملے لگاتار بڑھ رہے ہیں اور گزشتہ 24 گھنٹوں کے دوران ان میں 21 فیصد کا اضافہ درج کیا گیا ہے۔ مرکزی وزارت صحت کے مطابق بھارت بھر میں گزشتہ 24 گھنٹوں کے دوران کورونا کے ایک لاکھ 41 ہزار 986 کیسز درج کئے گئے۔ گزشتہ روز کورونا کے ایک لاکھ 17 ہزار 100 معاملے درج کئے گئے تھے۔ خیال رہے کہ گزشتہ 11 دنوں میں کورونا کے یومیہ معاملوں میں 22 فیصد کا اضافہ درج کیا گیا ہے، 28 دسمبر کو کورونا کے 6358 معاملے درج کئے گئے تھے۔ گزشتہ 24 گھنٹوں کے دوران کورونا کے سبب 285 لوگوں کی جان چلی گئی۔ بھارت بھر میں یومیہ معاملوں میں اضافہ کے سبب شفایابی کی شرح میں کمی واقع ہوئی ہے اور فعال کیسز کی تعداد میں اضافہ درج کیا جا رہا ہے۔ فعال معاملوں کی تعداد 4 لاکھ 72 ہزار 169 ہو گئی ہے۔ فعال معاملے مجموعی کیسز کا 1.34 فیصد ہوگئے ہیں۔ جبکہ ملک بھر میں شفایابی کی شرح 97.30 فیصد ہے۔

بھارت میں گزشتہ 24 گھنٹوں کے دوران 40 ہزار 895 افراد نے شفایابی حاصل کر لی، جس کے بعد شفایاب ہونے والوں کی مجموعی تعداد 3 لاکھ 44 ہزار 12 ہزار 740 ہوگئی ہے۔ اس کے علاوہ ملک میں یومیہ مثبت پائے جانے کی شرح میں بھی نمایاں اضافہ ہوا ہے اور یہ 9.28 فیصد تک پہنچ گئی ہے۔ وہیں، ہفتہ وار پازیٹیوٹی کی شرح 5.66 فیصد تک پہنچ گئی ہے۔ گزشتہ 24 گھنٹوں کے دوران ملک بھر میں ویکسین کی 90 لاکھ 59 ہزار 360 خوراکیں لگائی گئیں اور مجموعی طور پر اب تک 1506192903 کورونا ویکسین کی خوراکیں دی جا چکی ہیں۔