اسلام ٹائمز۔ متحدہ قومی موومنٹ پاکستان کی رابطہ کمیٹی نے مری میں سیاحوں کی ہلاکت پر گہرے دکھ اور افسوس کا اظہار کرتے ہوئے ہلاک ہونے والے افراد کے لواحقین سے دلی ہمدردی کا اظہار کیا اور کہا کہ ایم کیو ایم آپ کے دکھ میں برابر کی شریک ہے۔ رابطہ کمیٹی نے اپنے بیان میں کہا کہ رپورٹس کے مطابق گنجائش سے زیادہ سیاحوں کی آمد سے یہ افسوسناک صورتحال پیدا ہوئی، رش کی صورتحال کو دیکھتے ہوئے پہلے ہی لوگوں کو اپیل کی جانی چاہئے تھی کہ مزید سیاح آنے سے گریز کریں۔ رابطہ کمیٹی نے انتظامیہ سے اپیل کی کہ ریسکیو آپریشن تیز کیا جائے اور مری میں موجود سیاحوں کو باحفاظت نکالنے کیلئے تمام وسائل بروئے کار لائے جائیں۔