واضح رہے کہ ملائشیا یونیورسٹی سے الیکٹرک انجینئرنگ میں پی ایچ ڈی کی ڈگری حاصل کرنے کے ساتھ ساتھ ڈاکٹر شہید فادی البطش نے 18 موضوعات پر سائنسی تحقیقات بھی شائع کی تھیں اور جاپان، برطانیہ، فن لینڈ، اسپین اور سعودی عرب میں منعقد ہونے والی متعدد عالمی کانفرنسوں میں دسیوں نئے پراجیکٹ متعارف کروائے تھے جن کے جواب میں انہیں سال 2014ء میں سعودی کانفرنس Saudi Arabia Smart Grid conference۔SASC میں بہترین تحقیق کے انعام کے ساتھ ساتھ سال 2015ء میں ملائشیا یونیورسٹی میں منعقد ہونے والے تحقیقاتی مقابلے University of Malaya Three-Minute-Thesis Competition میں بھی پہلے انعام سے نوازا گیا۔ ریسرچ گیٹ (Researchgate) نامی تحقیقاتی مجلے کے مطابق شہید ڈاکٹر فادی البطش کی تحقیقات کا مطالعہ کرنے والے محققین کی کل تعداد 5 ہزار 500 افراد سے زائد ہے جبکہ 60 سے زائد محققین نے اپنی تحقیقات میں ان سے اقتباس بھی کیا ہے۔ فلسطینی مزاحمتی محاذ کے ساتھ علمی تعاون کرنے والے وہ ایسے پہلے شخص تھے جنہوں نے فلسطینی انجنیئروں کی عالمی تنظیم بنانے کی پیشکش کی جس کی ملائشیا کی نمائندگی ان کے پاس ہو۔ علاوہ ازیں وہ ملائشیا میں اپنی اقامت گاہ کی قریبی مسجد "العباس" میں امام جماعت ہونے کے ساتھ ساتھ MyCare اور i4Syria سمیت متعدد سماجی فلاحی تنظیموں کے سربراہ بھی تھے جبکہ غاصب صیہونی رژیم اسرائیل کی جاسوس تنظیم موساد کی جانب سے انہیں 21 اپریل 2018ء کے روز فجر کے وقت مسجد جاتے ہوئے ٹارگٹ کلنگ کی ایک کارروائی میں شہید کر دیا گیا تھا۔ تب وقوعے کے بعد عینی شاہدین نے بتایا تھا کہ ان کو 10 سے زائد گولیوں کا نشانہ بنانے والے 2 موٹر سائیکل سوار تھے جو کارروائی کے بعد فرار ہونے میں کامیاب ہو گئے۔
 

اسلام ٹائمز