اگر یمن میں جارحیت جاری رکھی تو تمہیں جغرافیائی گہرائی میں نشانہ بنائینگے، امارات کو صنعاء کا انتباہ

اسلام ٹائمز۔ یمنی مزاحمتی تحریک انصاراللہ کے مرکزی رہنماء محمد البخیتی نے عرب چینل کے ساتھ گفتگو میں متحدہ عرب امارات کو خبردار کیا ہے کہ اگر وہ یمن میں اپنی جارحیت جاری رکھے گا تو یمنی مسلح افواج اس کی جغرافیائی گہرائی میں واقع حساس مقامات کو نشانہ بنائیں گی۔ تفصیلات کے مطابق العربی کو دیئے گئے ایک انٹرویو میں محمد البخیتی نے کہا کہ جارح سعودی شاہی رژیم اور متحدہ عرب امارات کے درمیان حال ہی میں ایک معاہدہ طے پایا ہے جس کے مطابق جارح سعودی شاہی رژیم نے شبوہ سمیت یمن کے متعدد جنوبی صوبے متحدہ عرب امارات کے حوالے کر دیئے ہیں جس کے جواب میں متحدہ عرب امارات بھی ماضی کی طرح اپنی پوری طاقت کے ساتھ یمنی جنگ میں لوٹ آیا ہے جبکہ قبل ازیں وہ یمن پر جارحیت سے ہاتھ کھینچنے کا ارادہ رکھتا تھا لہذا ہم نے بھی اسے ایک اور موقع دیا اور اس کی سرزمین پر جوابی حملہ نہیں کیا لیکن اب افسوس کے ساتھ کہنا پڑتا ہے کہ اس نے دوبارہ تناو میں اضافہ شروع کر دیا ہے۔ انہوں نے کہا کہ ہم اس موقع پر متحدہ عرب امارات کو نصیحت کرتے ہیں کہ وہ تناؤ میں اضافے کے اقدامات کو مزید آگے نہ بڑھائے کیونکہ اگر یہ تناؤ جاری رہا تو یمن اس کی سرزمین پر جوابی کارروائی انجام دینے پر مجبور ہو جائے گا۔۔ ہم اس وقت جنگ کی حالت میں ہیں! انہوں نے یمنی سرزمین پر اماراتی حملوں کے تسلسل کے باعث اماراتی سرزمین پر بیلسٹک میزائل کے ذریعے ممکنہ یمنی جوابی کارروائی سے متعلق میزبان کے سوال کے جواب میں کہا کہ جی بالکل! یقینی طور پر! کیونکہ ہم جنگ کی حالت میں ہیں!