QR Code
جماعت اسلامی کا احتجاج مہنگائی سے توجہ ہٹانے کیلئے ہے، شہلا رضا
16 Jan 2022 21:50
ایک بیان میں پی پی رہنما نے کہا کہ عوام پر 350 ارب روپے کے ٹیکس لاد دیئے گئے لیکن جماعت اسلامی کو عام آدمی کے مسائل سے کوئی واسطہ نہیں، اگر جماعت اسلامی کو بلدیاتی قانون سے کوئی مسئلہ ہوتا تو ترمیم دیتی۔
اسلام ٹائمز۔ پاکستان پیپلز پارٹی کی رہنما و سابق ڈپٹی اسپیکر سندھ شہلا رضا نے جماعت اسلامی کے بلدیاتی ایکٹ کے خلاف احتجاج پر کڑی تنقید کرتے ہوئے کہا ہے کہ احتجاج مہنگائی سے توجہ ہٹانے کیلئے کیا جا رہا ہے۔ اپنے ردعمل میں شہلا رضا نے کہا کہ بلدیاتی ایکٹ کے خلاف احتجاج پر جماعت اسلامی کو شرم آنی چاہیئے، جماعت اسلامی پٹرولیم، بجلی، گیس کی قیمتوں پر آواز بلند کرے۔
شہلارضا نے کہا کہ عوام پر 350 ارب روپے کے ٹیکس لاد دیئے گئے لیکن جماعت اسلامی کو عام آدمی کے مسائل سے کوئی واسطہ نہیں، اگر جماعت اسلامی کو بلدیاتی قانون سے کوئی مسئلہ ہوتا تو ترمیم دیتی۔ انہوں نے کہا کہ سندھ اسمبلی میں ان کے نمائندے اپنی ترمیم پیش کرتے، جماعت اسلامی کی دھرنا سیاست کو باشعور شہریوں نے مسترد کردیا ہے، مہنگائی کے خلاف بیدار عوام کو گمراہ کرنے کیلئے بلدیاتی نظام کا شور ڈالا گیا، کراچی پر غیر مقامیوں کے قبضے کی بات جماعت کی منافقت کا اظہار ہے۔
خبر کا کوڈ: 973926