اسلام ٹائمز - لانگ مارچ کے پیش نظر پنجاب میں موبائل فون سروس بند کرنے کا فیصلہ

لانگ مارچ کے پیش نظر پنجاب میں موبائل فون سروس بند کرنے کا فیصلہ

قانون نافذ کرنیوالے اداروں نے وزیراعلیٰ پنجاب کو موبائل فون سروس بند کرنے کے حوالے سے بریفنگ دی، جس پر وزیراعلیٰ پنجاب حمزہ شہباز نے لاہور کے 20 اور پنجاب کے 350 مقامات پر موبائل فون سروس بند کرنے کی منظوری دیدی۔

اسلام ٹائمز۔ حکومت نے تحریک انصاف کے لانگ مارچ کو روکنے کے لیے پنجاب بھر میں جزوی طور پر موبائل فون سروس بند کرنے کا فیصلہ کر لیا۔ تفصیلات کے مطابق پاکستان تحریک انصاف کی جانب سے 25 مئی کو اسلام آباد کی جانب لانگ مارچ کا اعلان کیا گیا، جسے روکنے کے لیے لاہور سے اسلام آباد جانے والے تمام راستے سیل کر دیئے گئے ہیں۔ پارٹی ذرائع کا کہنا ہے کہ تحریک انصاف کے لانگ مارچ کے پیش نظر پنجاب بھر میں جزوی طور پر موبائل فون سروس بند کئے جانے کا فیصلہ کیا گیا ہے جبکہ صوبے بھر میں 350 مقامات پر موبائل فون سروس بند کرنے کی منظوری دے دی گئی ہے۔

قانون نافذ کرنے والے اداروں نے وزیراعلیٰ پنجاب کو موبائل فون سروس بند کرنے کے حوالے سے بریفنگ دی، جس پر وزیراعلیٰ پنجاب حمزہ شہباز نے لاہور کے 20 اور پنجاب کے 350 مقامات پر موبائل فون سروس بند کرنے کی منظوری دے دی۔ ذرائع نے بتایا کہ پی ٹی آئی کا لانگ مارچ روکنے کیلئے اسلام آباد، پنجاب اور سندھ میں دفعہ 144 نافذ کر دی گئی ہے اور لاہور سے وفاقی دارالحکومت اسلام آباد جانے والے تمام راستے سیل کر دیئے گئے ہیں۔ پارٹی ذرائع کے مطابق وزیراعلیٰ کی منظوری کے بعد محکمہ داخلہ پنجاب کو تجویز بھیجی جائے گی، جس کے بعد محکمہ داخلہ پنجاب عملدرآمد کیلئے پی ٹی اے کو ہدایات بھیجنے کیلئے ایم او آئی کو ایڈوائس بھیجے گا۔