115 عزاداروں پر مقدمہ، رانی پور پریس کلب کے باہر بھوک ہڑتالی کیمپ قائم

متعلقہ فائیلیںاسلام ٹائمز۔ سندھ کے شہر رانی پور میں محرم الحرام کے عشرہ اول کے بعد عزاداروں کے خلاف مقدمات قائم کرنے پر پریس کلب رانی پور کے صحن میں بھوک ہڑتال کیمپ قائم کردیا گیا۔ قبل ازیں عزاداروں کی جانب سے رانی پور پریس کلب پر احتجاج کیا گیا، جس سے خطاب میں شیعہ رہنماؤں نے کہا کہ ہمیں عزاداری امام حسین علیہ السلام کرنے کی سزا دی جا رہی ہے، ہم ساٹھ برس سے گاؤں وڈا بھیلار میں عزاداری کرتے ہیں لیکن اس برس ایس ایچ او رانی پور نے ماتمی جلوس کو پولیس سیکیورٹی دینے کے باوجود پولیس تھانہ رانی پور پر سرکاری مدعیت میں مقدمہ درج کیا ہے۔ رہنماؤں کے مطابق مقدمہ میں ایک سو پندرہ عزاداروں کو نامزد کیا گیا ہے، غیرمعینہ مدت تک پریس کلب رانی پور کے صحن میں بھوک ہڑتال کیمپ قائم کررہے ہیں۔ بھوک ہڑتالی کیمپ پر مختلف شیعہ تنظیموں کے رہنماؤں، کارکنان اور عزادار حسین علیہ السلام کی آمد جاری ہے۔