Wednesday 25 Mar 2020 20:30

ہائی جیکر ہاشم قریشی کا اسلام ٹائمز کیساتھ خصوصی ویڈیو انٹرویو(حصہ2)

Name: ہائی جیکر ہاشم قریشی کا اسلام ٹائمز کیساتھ خصوصی ویڈیو انٹرویو(حصہ2)
Uploaded: 2024-04-20 17:16

جموں کشمیر ڈیموکریٹک لبریشن پارٹی کے سربراہ ہاشم قریشی کا ’’اسلام ٹائمز‘‘ کیساتھ خصوصی انٹرویو میں کہنا تھا کہ اگر ہم بھارت کے مظالم کیخلاف احتجاج کرتے ہیں تو ہمیں گلگت بلتستان اور پاکستان کے زیر انتظام کشمیریوں پر مظالم کیخلاف بھی آواز اٹھانی چاہیئے۔ انہوں نے کہا کہ مسئلہ کشمیر بہت ہی الجھا ہوا مسئلہ ہے، انہوں نے یہ بھی کہا کہ پاکستان خود یہ چاہتا ہے کہ مسئلہ کشمیر التوا میں رہے، پہلے پاکستان نے متحدہ کشمیر کو ٹکڑوں میں تقسیم کیا، اب بھارت نے وہی کام یہاں کیا۔ انہوں نے کہا کہ اگر پاکستان چاہتا تو گلگت بلتستان اور آزاد کشمیر وغیرہ کو ایک ریاست قرار دیتا تو بھارت بھی کشمیر چھوڑنے پر مجبور ہوتا۔ ہاشم قریشی نے کہا کہ کشمیر کے حوالے سے عمران خان بھی دو سال میں کوئی مختلف کام نہیں کر پایا ہے۔ انہوں نے کہا کہ دفعہ 370 کے خاتمے سے کشمیر اور بھارت کے درمیان جو رشتے قائم تھے، ان تمام رشتوں کا خاتمہ ہوگیا۔ انہوں نے کہا کہ دفعہ 370 کے خاتمے کے بعد کشمیریوں کے دلوں میں بھارت کیخلاف نفرت میں اضافہ ہی ہوا ہے۔ انہوں نے نریندر مودی سے اپیل کی کہ وہ تمام بھارتیوں کا وزیراعظم بننے کی کوشش کرے، نہ صرف ہندو انتہاء پسندوں کا لیڈر۔ ہاشم قریشی نے مزید کہا کہ میں نے ہمیشہ بھارتی حکومتوں کی مختلف پیشکشوں کو اسلئے ٹھکرایا ہے کہ میرے لئے کشمیریوں کی حق پر مبنی آواز کی حمایت و ترجمانی کے سوا کوئی دوسرا راستہ نہیں ہے۔ ہاشم قریشی نے آخر میں کہا کہ کشمیری قیادت کے پاس کوئی لائحہ عمل اور روڈ میپ نہیں ہے۔

متعلقہ فائیلیںمقبوضہ جموں کشمیر کے آزادی پسند رہنماء ہاشم قریشی کا تعلق کشمیر کے شہر خاص سرینگر سے ہے۔ ہاشم قریشی گذشتہ 35 برس سے مقبوضہ کشمیر میں ڈھائے جانیوالے بھارتی مظالم و تشدد کیخلاف عوامی تحریک کا سرگرم حصہ ہیں، 1971ء میں شہید مقبول بٹ کی سربراہی میں تربیت حاصل کرنیکے بعد ہندوستان کے ہوائی جہاز کو سترہ سال کی عمر میں ہی اپنے ساتھی اشرف قریشی کے ساتھ ملکر شہید مقبول بٹ کے بنائے ہوئے منصوبے کے تحت اغوا کرکے لاہور پہنچایا۔ ہاشم قریشی نے تقریباً گیارہ سال تک بھارت اور پاکستان میں قید کی زندگی گزاری ہے، اس سفر کے دوران انہوں نے چار کتابیں بھی لکھی ہیں، عسکری محاذ سے ابھرنے والے ہاشم قریشی کی سربراہی میں فعلاً آزادی کشمیر کی خاطر جموں و کشمیر ڈیموکریٹک لبریشن پارٹی ایک فعال تنظیم ہے۔ ہاشم قریشی ریاست جموں و کشمیر میں فرقہ واریت، تقسیم کشمیر اور کشمیر کے کسی بھی ملک کیساتھ الحاق کیخلاف ہیں اور پوری ریاست جموں و کشمیر کو ایک وحدت سمجھتے ہیں، انہوں نے ریاست جموں و کشمیر کے لوگوں کے مفاد اور South Asia میں امن کی خاطر کشمیر کو ایک آزاد اور خود مختار ملک بنانے کیلئے گونا گوں مشکلات و الزامات کا سامنا کیا ہے۔ اسلام ٹائمز کے نمائندے نے ہاشم قریشی سے مقبوضہ کشمیر کے موجودہ حالات، عسکری محاذ، دفعہ 370، بھارتی مظالم اور مزاحمتی قیادت کے حوالے سے ایک خصوصی انٹرویو کا اہتمام کیا۔ انٹرویو کا تفصیلی ہونا باعث بنا کہ اسے دو حصوں میں تقسیم کیا گیا، انٹرویو کا پہلا حصہ 22 مارچ کو آپکی خدمت میں پیش کیا گیا تھا، دوسرا حصہ آپ قارئین کرام کے پیش خدمت ہے۔ قارئین محترم آپ اس ویڈیو سمیت بہت سی دیگر اہم ویڈیوز کو اسلام ٹائمز کے یوٹیوب چینل کے درج ذیل لنک پر بھی دیکھ اور سن سکتے ہیں۔(ادارہ)
https://www.youtube.com/channel/UCnodHW8xrEdtL-iNo9nrjhQ/videos

خبر کا کوڈ : 851970