QR Code

لشکر جھنگوی اور بی ایل اے کا طالبان سے گہرا تعلق ہے

اسلام آباد کو تمام دہشتگرد قوتوں سے خطرہ ہے، طالبان دھماکے کرتے ہیں، تسلیم نہیں کرتے، رحمان ملک

10 Apr 2014 23:51

اسلام ٹائمز: قائمہ کمیٹی داخلہ کے اجلاس کے بعد میڈیا سے غیر رسمی گفتگو میں سابق وزیر داخلہ کا کہنا تھا کہ غازی فورس کے پانچ سو دہشتگرد کوہاٹ میں موجود ہیں، اسکے دہشتگرد اسلام آباد کے مدارس میں پڑھتے رہے، اسلام آباد کو تمام دہشتگرد قوتوں سے خطرہ ہے۔

اسلام ٹائمز۔ سابق وفاقی وزیر داخلہ سینیٹر رحمان ملک کا کہنا ہے کہ سبزی منڈی میں بم پہلے سے نصب تھا، طالبان دھماکے کرتے ہیں لیکن تسلیم نہیں کرتے، بارہ کہو دہشتگردوں کا گڑھ بنتا جا رہا ہے، اسلام آباد کو تمام دہشتگرد قوتوں سے خطرہ ہے۔ سابق وزیر داخلہ سینیٹر رحمان ملک نے اسلام آباد میں قائمہ کمیٹی داخلہ کے اجلاس کے بعد میڈیا سے غیر رسمی گفتگو کرتے ہوئے کہا کہ بم امرود کے کریٹ میں نہیں تھا، طالبان سے لشکر جھنگوی اور بی ایل اے کا گہرا تعلق ہے، یہ تنظیمیں ایک دوسرے کے دھماکوں کی ذمہ داریاں قبول کرتی ہیں، اس حوالے سے تحقیقاتی اداروں کی رپوٹس بھی موجود ہیں۔ انہوں نے کہا کہ بی ایل اے کے پاس خودکش حملہ آور بھی موجود ہیں، لشکر جھنگوی کا بلوچستان میں سربراہ سیال نامی شخص ہے، طالبان دھماکے کرتے ہیں لیکن تسلیم نہیں کرتے۔ ان کا کہنا تھا کہ طالبان سے مذاکرات کامیاب ہوتے نظر نہیں آ رہے، طالبان کے مختلف گروپ مذاکرات کو کامیاب نہیں ہونے دیں گے۔ رحمان ملک نے کہا کہ غازی فورس کے پانچ سو دہشتگرد کوہاٹ میں موجود ہیں، اس کے دہشتگرد اسلام آباد کے مدارس میں پڑھتے رہے، اسلام آباد کو تمام دہشتگرد قوتوں سے خطرہ ہے، بارہ کہو دہشتگردوں کا گڑھ بنتا جا رہا ہے۔

خبر کا کوڈ: 371571