QR Code

فاٹا کے پاکستان میں انضمام پر قبائلی عوام مبارکباد کے مستحق ہیں، اعجاز ہاشمی

24 May 2018 22:52

جے یو پی کے مرکزی صدر کا کہنا تھا کہ دہشتگردی، جہالت اور غربت کا خاتمہ ہوگا۔ پارلیمانی جماعتوں کی کاوشیں قابل تعریف ہیں جنہوں نے فاٹا کے انضمام میں دلچسپی لی، بروقت اور اچھے فیصلے کئے اور تمام رکاوٹوں کو دور کر دیا گیا۔

اسلام ٹائمز۔ جمعیت علما پاکستان کے مرکزی صدر پیر اعجاز احمد ہاشمی نے فاٹا کے پاکستان میں انضمام کے دیرینہ ایشو کو حل کرنے پر قبائلی عوام کو مبارکباد پیش کرتے ہوئے کہا ہے کہ خطے کے محب وطن عوام کیلئے ترقی کے راستے کھل جائیں گے، دہشتگردی، جہالت اور غربت کا خاتمہ ہوگا۔ پارلیمانی جماعتوں کی کاوشیں قابل تعریف ہیں جنہوں نے فاٹا کے انضمام میں دلچسپی لی، بروقت اور اچھے فیصلے کئے اور تمام رکاوٹوں کو دور کر دیا گیا۔ لاہور میں کارکنوں سے خطاب میں انہوں نے کہا کہ یہ جمہوریت کا حسن اور ملکی سلامتی کا تقاضا تھا کہ خطے کے تمام طبقات کو ترقی کے یکساں حاصل ہوں تاکہ وفاق پاکستان مضبوط ہو اور عوام خوشحال ہوں۔ ان کا کہنا تھاکہ فاٹا کی ایجنسیوں کی پاکستان میں باضابطہ انضمام محب وطن قوتوں اور جمہوریت کی فتح ہے، جو خطے کے عوام کا دیرینہ مطالبہ تھا۔ برطانوی دور کی ناپسندیدہ یادگار ایف سی آر سے بھی نجات حاصل ہوگئی ہے، اب لوگ اپنے نمائندے منتخب کر سکیں گے اور صوبائی اسمبلی میں بھی وقت آنے پر اپنی آواز بلند کر سکیں گے۔

خبر کا کوڈ: 727157