QR Code

آئندہ عام انتخابات میں کسی بھی غیر جمہوری عمل کی شدید مخالفت کرینگے، ڈاکٹر عبدالمالک بلوچ

25 May 2018 14:29

تربت میں پارٹی کارکنوں سے خطاب کرتے ہوئے وزیراعلٰی بلوچستان کا کہنا تھا کہ تربت شہر اور اس میں ہونیوالی تبدیلی خود ثابت کرتی ہے کہ ہمارا عوام کیساتھ رشتہ وتعلق غیر متزلزل ہے۔ ضلع کیچ کے عوام نے ہر وقت ہم پر اعتماد کیا اور آئندہ بھی کرینگے۔

اسلام ٹائمز۔ نیشنل پارٹی کے مرکزی رہنماء وسابق وزیراعلٰی بلوچستان ڈاکٹر عبدالمالک بلوچ نے کہا ہے کہ بلوچستان بھر میں بھرپور انداز میں انتخابات میں حصہ لیں گے۔ الیکشن کارکردگی کی بنیاد پر لڑیں گے۔ مختصر مدت میں بلوچستان کے عوام کو امن وامان سمیت بہت کچھ دیا۔ آج2013ء اور 2018ء کے بلوچستان میں بہت کچھ فرق ہے۔ کارکن آپس میں الجھنے کے بجائے اپنے سیاسی سفر کو آگے کی جانب بڑھائیں۔ تربت میں پارٹی کارکنوں سے خطاب میں ڈاکٹرعبدالمالک بلوچ نے کہا کہ نیشنل پارٹی ایک قومی سیاسی جماعت ہے، جو بلوچستان کے عوام کے قومی وسیاسی حقوق کے حصول کیلئے بھرپور انداز میں سیاسی جدوجہد کر رہی ہے۔ ہمیں ذات سے بالاتر ہوکر بلوچستان کے قومی سیاسی مفادات کو ترجیح دینا ہوگا۔ بلوچستان کو 2018ء میں مختلف چیلنجز کا سامنا ہے اور ہر الیکشن میں نیشنل پارٹی کا مقابلہ کنگز پارٹیوں سے رہا ہے۔ پارٹی کے سیاسی کارکنوں نے ثابت قدمی کے ساتھ وطن وقوم کے دفاع کیلئے بھرپور سیاسی جدوجہد کی ہے۔ سیاست میں کسی بھی مداخلت کے خلاف ہیں۔ الیکشن کے عمل کو متاثر کرنے کے کسی بھی غیر جمہوری وغیر سیاسی عمل کی شدید مخالفت کریں گے۔ تربت شہر اور اس میں ہونے والی تبدیلی خود ثابت کرتی ہے کہ ہمارا عوام کے ساتھ رشتہ وتعلق غیر متزلزل ہے۔ ضلع کیچ کے عوام نے ہر وقت ہم پر اعتماد کیا اور آئندہ بھی کریں گے۔

خبر کا کوڈ: 727199