QR Code

بلوچستان میں امن، ترقی وخوشحالی ہماری سیاست کا محور ہے، جام کمال خان

19 Jun 2018 10:56

حب میں‌ پارٹی کارکنوں سے خطاب میں بلوچستان عوامی پارٹی کے صدر کا کہنا تھا کہ مسلم لیگ (ن) کی حکومت نے لسبیلہ پر کوئی توجہ نہیں دی۔ جو وزرائے اعلٰی رہے، انہوں نے ترقیاتی فنڈز صرف اپنے حلقوں پر خرچ کئے اور ملازمتوں کے حق سے بھی لسبیلہ کو محروم رکھا گیا۔

اسلام ٹائمز۔ بلوچستان عوامی پارٹی کے سربراہ جام کمال خان عالیانی نے کہا ہے کہ بی اے پی ایک نظریئے کا نام ہے۔ بلوچستان میں امن، ترقی و خوشحالی ہماری سیاست کا محور ہے۔ ہماری پارٹی میں ٹکٹوں کی تقسیم پر کوئی اختلافات نہیں ہیں۔ حب میں‌ پارٹی کارکنوں سے خطاب میں جام کمال خان کا کہنا تھا کہ جام بھوتانی اتحاد لسبیلہ کے عوام کی خواہشات اور امنگوں کو مد نظر رکھتے ہوئے وسیع تر عوامی مفاد میں کیا ہے۔ سردار صالح محمد بھوتانی بی اے پی کے نامزد امیدوار ہیں۔ سردار اسلم بھوتانی نے آزاد امیدوار کی حیثیت سے کاغذات جمع کرائے ہیں۔ ہم معاملات کو انشاء اللہ سلجھائیں گے۔ سیاست میں کشتیاں جلائی نہیں جاتی، کشتیاں جوڑی جاتی ہیں۔ جب آپ کشتیاں جلائیں گے تو آپ کہاں جاسکیں گے۔ گذشتہ الیکشن میں ہم نے آزاد امیدوار کی حیثیت سے 54 ہزار ووٹ لئے اور ہمارے مخالفین اتحاد اور پراپیگنڈوں کے باوجود صرف پینتیس ہزار ووٹ حاصل کر پائے۔ صوبائی سطح پر لسبیلہ کو نظر انداز کئے جانے کی وجہ سے حب بائی پاس سمیت اہم منصوبے ادھورے رہ گئے۔ مسلم لیگ (ن) کی حکومت نے لسبیلہ پر توجہ نہیں دی۔ جو وزرائے اعلٰی رہے، انہوں نے ترقیاتی فنڈز صرف اپنے حلقوں پر خرچ کئے اور ملازمتوں کے حق سے بھی لسبیلہ کو محروم رکھا گیا۔

 

خبر کا کوڈ: 732222