اسلام ٹائمز - یوم شہداء

اسلام ٹائمز: یوم شہداء کی تقریب سے خطاب میں پی اے ٹی کے سربراہ کا کہنا تھا کہ انقلاب کی فتح کا انتظار کرو یا میری شہادت کا تیسرا کوئی راستہ نہیں، میں ڈرنے والا، جھکنے والا نہیں، ظالم حکمران کسی بھی حربے سے مجھے ڈرا سکتے ہیں نہ جھکا سکتے ہیں۔ میں انقلاب کی فتح تک جنگ لڑوں گا۔

اسلام ٹائمز۔ پاکستان عوامی تحریک کے سربراہ ڈاکٹر طاہرالقادری کا ماڈل ٹاؤن لاہور میں یوم شہداء کی تقریب سے خطاب میں کہنا تھا کہ ظالم حکمرانوں نے ظلم کی انتہا کر دی ہے، میں نے پہلے کہ کہا تھا کہ انقلاب پھولوں کی سیج نہیں، اس کے لئے قربانیاں دینی پڑتی ہیں، لیکن آپ کی ہمت سے آج حکمرانوں کے اقتدار کا سورج غروب ہونے والا ہے۔ انہوں نے کہا کہ ہمارے نہتے کارکنوں پر تشدد کیا گیا، ان پر گولیاں چلائی گئیں، لیکن ظلم کے خلاف آپ کی استقامت کو سلام پیش کرتا ہوں۔ انہوں نے کہا کہ ماڈل ٹاؤن میں بھوکے پیاسوں کے ساتھ ہوں، میں نے بھی کھانا نہیں کھایا۔ انہوں نے کہا کہ کارکن میرا پہرا دے رہے ہیں، میں ساری رات آپ کا پہرہ دیتا ہوں۔ انہوں نے کہا کہ میں اللہ کے حضور آپ کے لئے جاگتا ہوں اور آپ کے مقدر کی تبدیلی کی دعا کرتا ہوں۔