اسلام ٹائمز - ایرانی سفیر کا میٹ دی پریس سے خطاب

اسلام ٹائمز: صحافیوں سے گفتگو میں ایرانی سفیر کا کہنا تھا کہ سعودی عرب کی قیادت میں بننے والے اسلامی ممالک کے فوجی اتحاد میں پاکستان کی شمولیت پر ایرانی سفیر کا کہنا تھا کہ پاکستان بہت سوچ سمجھ کر فیصلے کر رہا ہے اور اس مسئلے پر پاکستانی پالیسی بڑی متوازن اور قابل تعریف ہے۔

اسلام ٹائمز۔ پاکستان میں تعینات ایرانی سفیر مہدی ہنردوست نے کہا ہے کہ کوئی اچھا یا برا دہشت گرد نہیں ہوتا۔ دہشت گرد صرف دہشت گرد ہوتا ہے جس سے آہنی ہاتھوں سے نمٹنا ضروری ہے۔ دہشت گردی ختم کرنے کے لئے دہشت گرد گروپوں کی فنانسنگ اور لاجسٹک سپورٹ روکنا ہوگی۔ پاکستان میں توانائی بحران پر قابو پانے کے لئے گیس پائپ لائن منصوبہ بہت اہم ہے۔ پاکستان اپنے حصے کا کام مکمل کرے۔ یہ باتیں انہوں نے جمعہ کو نیشنل پریس کلب میں ’’میٹ دی پریس‘‘ پروگرام میں گفتگو کرتے ہوئے کہیں۔ ایران کے سفیر کا کہنا تھا کہ پاک ایران تجارت کا فروغ بہت ضروری ہے، دونوں ممالک کے درمیان دوطرفہ تجارت میں اضافے کی بہت زیادہ گنجائش موجود ہے، اس کے لئے موجود مواقعوں سے فائدہ اٹھانا ہوگا۔ انہوں نے کہا کہ ایران کے صدر پاکستان کے اہم دورے پر آ رہے ہیں، یہ دورہ دونوں ممالک کے درمیان تمام شعبوں میں دوطرفہ تعلقات کے فروغ کے لئے انتہائی اہمیت کا حامل ہے۔ انہوں نے کہا کہ پاکستان میں توانائی کی قلت پر قابو پانے کے لئے ایران پاکستان گیس پائپ لائن منصوبہ بہت اہمیت کا حامل ہے، ایران اپنے علاقے میں گیس پائپ لائن کی مرمت اور تعمیر مکمل کرچکا ہے، اب پاکستان کو اپنے حصے کا کام کرنا ہے۔ بعد میں ایرانی سفیر نے نیشنل پریس کلب میں ایک پودا بھی لگایا اور دعا کی۔