اسلام ٹائمز - وزیراعظم کا دورہ ڈی آئی خان

اسلام ٹائمز: جے یو آئی کے امیر کی دعوت پر وزیراعظم نے ڈی آئی خان کا دورہ کیا، رتہ کلاچی سٹیڈیم میں جلسہ عام سے خطاب کرتے ہوئے وزیراعظم نے ترقیاتی پیکج اور زرعی یونیورسٹی سمیت ائیرپورٹ و دیگر منصوبوں کا اعلان کیا، ڈی آئی خان میں ہونیوالے جلسہ میں پیزو، ٹانک، لکی اور بنوں کے شہریوں نے بڑی تعداد میں شرکت کی۔

اسلام ٹائمز۔ وزیراعظم میاں نواز شریف نے اعلان کیا ہے کہ مسلم لیگ نواز اور جے یو آئی ملکر نیا پاکستان بنائیں گے۔ جمیعت علماء اسلام کے امیر مولانا فضل الرحمن کی دعوت پر وزیراعظم نواز شریف نے ڈیرہ اسماعیل خان کا دورہ کیا۔ اس دورے کے دوران انہوں نے پاک چین اقتصادی کوریڈور کا افتتاح کیا۔ بعد ازاں انہوں نے رتہ کلاچی سٹیڈیم میں عوامی جلسہ عام سے خطاب کیا۔ جے یو آئی (ف) کے زیراہتمام جلسے میں لکی، پیزو، بنوں و دیگر علاقوں سے شہریوں کی بڑی تعداد نے شرکت کی۔ البتہ ڈی آئی خان کے شہریوں نے اس دورے میں عدم دلچسپی ظاہر کی۔ وزیراعظم نے اپنے خطاب میں زرعی یونیورسٹی، ائیرپورٹ کی توسیع، موٹروے و دیگر ترقیاتی منصوبوں کا اعلان کیا۔ جلسہ گاہ میں صرف جمیعت کے جھنڈے تھے، جبکہ مسلم لیگ نواز کے ضلعی رہنماوں کو اس دورے کے دوران وزیراعظم سے دور رکھا گیا، جس پر انہوں نے دبے لفظوں میں ناراضگی کا اظہار کیا۔