اسلام ٹائمز۔ وزیراعظم میاں نواز شریف نے اعلان کیا ہے کہ مسلم لیگ نواز اور جے یو آئی ملکر نیا پاکستان بنائیں گے۔ جمیعت علماء اسلام کے امیر مولانا فضل الرحمن کی دعوت پر وزیراعظم نواز شریف نے ڈیرہ اسماعیل خان کا دورہ کیا۔ اس دورے کے دوران انہوں نے پاک چین اقتصادی کوریڈور کا افتتاح کیا۔ بعد ازاں انہوں نے رتہ کلاچی سٹیڈیم میں عوامی جلسہ عام سے خطاب کیا۔ جے یو آئی (ف) کے زیراہتمام جلسے میں لکی، پیزو، بنوں و دیگر علاقوں سے شہریوں کی بڑی تعداد نے شرکت کی۔ البتہ ڈی آئی خان کے شہریوں نے اس دورے میں عدم دلچسپی ظاہر کی۔ وزیراعظم نے اپنے خطاب میں زرعی یونیورسٹی، ائیرپورٹ کی توسیع، موٹروے و دیگر ترقیاتی منصوبوں کا اعلان کیا۔ جلسہ گاہ میں صرف جمیعت کے جھنڈے تھے، جبکہ مسلم لیگ نواز کے ضلعی رہنماوں کو اس دورے کے دوران وزیراعظم سے دور رکھا گیا، جس پر انہوں نے دبے لفظوں میں ناراضگی کا اظہار کیا۔
