اسلام ٹائمز - جنت نظیر گلگت بلتستان

اسلام ٹائمز: جنت نظیر سطح مرتفع دیوسائی، دیوسائی سے ملحقہ گاوں چلم اور استور میں آنے والے مقامات راما جھیل، رٹو، دیوسائی ہی سے ملحقہ علاقہ منی مرگ، ناگئی، قمری، رینبو لیک کا شمار گلگت بلتستان کے حسین ترین مقامات میں ہوتا ہے۔

اسلام ٹائمز۔ گلگت بلتستان کا شمار نہ صرف وطن عزیز پاکستان کے حسین ترین علاقوں میں ہوتا ہے بلکہ بغیر کسی مبالغے کے کہا جا سکتا ہے کہ اس جنت نظیر خطے کے چند گوشے ایسے ہیں، جو اپنی یکتائی، حسن و رعنائی اور جاذبیت کے اعتبار سے دنیا کے خوبصورت ترین مقامات میں سے ہو سکتے ہیں۔ ان مقامات میں جنت نظیر سطح مرتفع دیوسائی، دیوسائی سے ملحقہ گاوں چلم اور استور میں آنے والے مقامات راما جھیل، رٹو، دیوسائی ہی سے ملحقہ علاقہ منی مرگ، ناگئی، قمری، رینبو لیک شامل ہیں۔ ان میں کچھ مقامات تو ایسے ہیں جو دشمن ملک کی سرحد پر واقع ہونے کی وجہ سے عام آدمی کی پہنچ سے دور ہیں۔ یہ علاقے سردیوں میں برف کی سفید چادر اوڑھ کر منفی تیس ڈگری سینٹی گریڈ کے موسم کیساتھ اہل علاقہ بالخصوص سرحد پر موجود وطن عزیز کے محافظین، پاکستان آرمی کے شیر دل جوانوں کو امتحان میں ڈال دیتے ہیں۔ ہائیٹ، سرد ترین موسم، دنیا سے رابطہ منقطع ہونے کے سبب یہ علاقہ سردیوں کے آٹھ مہینے دنیا کی نظروں سے اوجھل ہوتا ہے، لیکن گرمیوں کے چند مہینے میں یہ علاقے وہ دلفریب اور دلکش نظارے پیش کرتے ہیں کہ خواب کا گماں ہوتا ہے۔