اسلام ٹائمز - ڈی آئی خان، ایم ڈبلیو ایم پریس کانفرنس

اسلام ٹائمز: پریس کانفرنس سے خطاب کرتے ہوئے قائد وحدت کا کہنا تھا کہ عمران خان کی جماعت نے مولانا سمیع الحق کو بھتہ دیا ہے۔ پولیس کی استعداد بڑھانے کی ضرورت ہے، کیونکہ یہ پولیس کا ادارہ دہشت گردی کو مدنظر رکھ کر تشکیل نہیں پایا تھا، پولیس میں دہشتگردوں کی بھرتی کا سلسلہ ختم ہونا چاہیئے۔ شہر میں دہشتگردی کا مزید کوئی سانحہ ہوا تو حکومت اور ادارے اس کے ذمہ دار ہوں گے۔

اسلام ٹائمز۔ مجلس وحدت مسلمین کے مرکزی سیکرٹری جنرل علامہ راجا ناصر عباس جعفری نے اپنے دورہ ڈی آئی خان کے آخری روز مقامی ہوٹل میں پریس کانفرنس سے خطاب کرتے ہوئے کہا ہے کہ حکومت اور ریاست کی بنیادی ذمہ داری اپنے شہریوں کو تحفظ فراہم کرنے کی ہے، جبکہ وطن عزیز میں تکفیر کے نام پر نفرتیں باںٹی جارہی ہیں۔ شہریوں کے درمیان نفرت و نفاق کی وجہ سے ملک کو خطرات لاحق ہیں۔ ڈی آئی خان جو کہ پرامن شہر تھا آج دہشتگردی کی آگ میں جل رہا ہے۔ ہمارے لیے پورے ملک کو ڈی آئی خان اور غزہ بنادیا گیا ہے۔ بیس ہزار سے زائد ہمارے شہداء ہیں، جبکہ ڈی آئی خان میں مسنگ پرسنز کا معاملہ انتہائی خطرناک ہے، جس پر ہم خاموش نہیں رہ سکتے۔ اگر ہمارے نوجوان زندہ ہیں تو عدالتوں میں پیش کئے جائیں، اگر شہید کردیئے گئے ہیں تو ان کی میتیں ہمارے حوالے کی جائیں۔ ہم اپنے مسنگ پرسنز کو نہیں بھلا سکتے۔ نیشنل ایکشن پلان صرف کراچی میں ہے، جبکہ دیگر ملک میں ایک مذاق بن کر رہ گیا ہے۔

پاکستان کو باہر سے نہیں اندر سے خطرہ ہے، اندرونی خطرے کا مقابلہ ایٹم بم بھی نہیں کرسکتا۔ ہمیں احتجاج کرنے سے روکا جاتا ہے، احتجاج پر ایف آئی آرز چاک کی جاتی ہیں، جبکہ احتجاج نہ کرنے کا نتیجہ ہے کہ بے گناہوں کی لاشیں کوئی اٹھانے کو تیار نہیں۔ میڈیا کے نمائندوں کے سوالات کا جواب دیتے ہوئے علامہ راجا ناصر کا کہنا تھا کہ 2 ستمبر کو ہم پنجاب اسمبلی کے سامنے دھرنا دیں گے۔ ریاست سے غلطی ہوئی ہے کہ اس نے ایک مخصوص ٹولے کو وسائل اور تربیت دیکر طاقتور کیا اور آج وہی ہمارا دشمن بنا ہوا ہے۔ عمران خان کی جماعت نے مولانا سمیع الحق کو بھتہ دیا ہے۔ پولیس کی استعداد بڑھانے کی ضرورت ہے، کیونکہ یہ پولیس کا ادارہ دہشت گردی کو مدنظر رکھ کر تشکیل نہیں پایا تھا، پولیس میں دہشتگردوں کی بھرتی کا سلسلہ ختم ہونا چاہیئے۔ شہر میں دہشتگردی کا مزید کوئی سانحہ ہوا تو حکومت اور ادارے اس کے ذمہ دار ہوں گے۔ پریس کانفرنس کے بعد صحافیوں کے اعزاز میں پرتکلف ظہرانہ دیا گیا۔