اسلام ٹائمز - ڈی آئی خان، ٹارگٹ کلنگ کیخلاف احتجاج

مجلس وحدت مسلمین ڈی آئی خان کے سیکرٹری جنرل علامہ غضنفر نقوی نے مظاہرین سے خطاب کرتے ہوئے کہا کہ ڈی آئی خان کو اہل تشیع کی مقتل گاہ میں بدل دیا گیا ہے جبکہ انتظامیہ اور قانون کے رکھوالے خواب غفلت کا شکار ہیں۔ دن دیہاڑے مختلف بازاروں اور شاہراہوں پہ اہل تشیع کو قتل کیا جاتا ہے، تمام تر سکیورٹی انتظامات اور سی سی ٹی وی کیمرے ہونے کے باوجود قاتل اطمینان سے اپنی کمین گاہوں تک واپس چلے جاتے ہیں۔

اسلام ٹائمز۔ ڈیرہ اسماعیل خان میں ٹارگٹ کلنگ کے پے در پے سانحات کے خلاف مجلس وحدت مسلمین نے احتجاجی مظاہرہ کیا ہے۔ احتجاجی ریلی سہ پہر تین بجے مسجد لاٹو فقیر سے برآمد ہوئی۔ ریلی میں خواتین، بچوں، بزرگوں سمیت اہل تشیع جوانوں نے بڑی تعداد میں شرکت کی۔ ریلی مرکزی امام باگاہ امام حسین (ع) سے ہوکر سرکلر روڈ فوارہ چوک پہ پہنچ کے احتجاجی دھرنے میں بدل گئی۔ مجلس وحدت مسلمین ڈی آئی خان کے سیکرٹری جنرل علامہ غضنفر نقوی نے مظاہرین سے خطاب کرتے ہوئے کہا کہ ڈی آئی خان کو اہل تشیع کی مقتل گاہ میں بدل دیا گیا ہے جبکہ انتظامیہ اور قانون کے رکھوالے خواب غفلت کا شکار ہیں۔ دن دیہاڑے مختلف بازاروں اور شاہراہوں پہ اہل تشیع کو قتل کیا جاتا ہے، تمام تر سکیورٹی انتظامات اور سی سی ٹی وی کیمرے ہونے کے باوجود قاتل اطمینان سے اپنی کمین گاہوں تک واپس چلے جاتے ہیں، یہ طرز عمل اداروں کی کارکردگی پہ سوالیہ نشان ہے۔ اس موقع پر قرارداد پیش کی گئی اور انتظامیہ کو متنبہ کیا گیا کہ اگر قاتلوں کی فی الفور گرفتاری عمل میں نہ آئی تو احتجاج کا انداز بدل دیا جائے گا۔