QR Code

کرگل لداخ روڈ کو فوری کھولنے کے اقدامات کئے جائیں، بلال زبیری

26 Sep 2011 20:54

اسلام ٹائمز: مہاجرین کے ایک اہم اجلاس َسے خطاب کرتے ہوئے مہاجرین کے سکریٹری جنرل کا کہنا تھا کہ جلد ہی مذکورہ روڈ کھولنے کے حوالے سے علماء، سیاستدانوں، سماجی و فلاحی تنظیموں کو اعتماد میں لے کر پرامن احتجاج کیا جائے گا اور یہ احتجاج عوامی مفاد میں ہو گا۔

 اسکردو:اسلام ٹائمز۔ مہاجرین کرگل و لداخ کے سکریٹری جنرل حافظ بلال زبیری نے کہا ہے کہ لداخ کرگل روڈ کو فی الفور کھولنے کے اقدامات کئے جائیں، مذکورہ روڈ کے کھولنے سے نہ صرف بچھڑے خاندانوں کو باہم ملنے کا موقع ملے گا بلکہ دو طرفہ تجارت کے ذریعے کروڑوں روپے زرمبادلہ بھی حاصل کیا جا سکتا ہے۔ یہ باتیں انہوں نے مہاجرین کے ایک اجلاس کے دوران خطاب کرتے ہوئے کیں۔ انہوں نے کہا کہ جلد ہی مذکورہ روڈ کھولنے کے حوالے سے علماء، سیاستدانوں، سماجی و فلاحی تنظیموں کو اعتماد میں لے کر پرامن احتجاج کیا جائے گا اور یہ احتجاج عوامی مفاد میں ہو گا۔ انہوں نے کہا کہ پچھلے چالیس سالوں سے مہاجرین اپنے جائز حقوق کیلئے آواز بلند کر رہے ہیں، تاہم بار بار مطالبات کے باوجود لداخ کرگل روڈ کھولنے کے لئے کوئی اقدامات نہیں کئِے جا رہے، جس کے باعث مہاجرین میں احساس محرومی بڑھتی جا رہی ہے۔ اجلاس سے خطاب کرتے ہوئے آل مہاجرین لدخ و کرگل ککے صدر محمد خان نے کہا کہ مہاجرین کے مسائل کو حل کرنے کے لئے حکومت کو ٹھوس اقدامات کرنے کی ضرورت ہے۔ انہوں نے کہا کہ مہاجرین کی آباد کاری کیلئے ایک پراجیکٹ کا پی سی ون تیار ہے، جس کو فوری طور پر منظور کیا جائے۔

خبر کا کوڈ: 101619