اسلام ٹائمز - عمران خان اپنے منہ سے بولے تو ہم مذاکرات کرنے کو تیار ہیں، قمر زمان کائرہ

عمران خان کے معاہدے پر عملدرآمد نہ کرتے تو ملک ڈیفالٹ ہو جاتا

عمران خان اپنے منہ سے بولے تو ہم مذاکرات کرنے کو تیار ہیں، قمر زمان کائرہ

فواد چودھری کو چہرے پر کپڑا ڈال کر لے جانے کی مذمت کرتا ہوں

اپنے ایک بیان میں وزیراعظم کے مشیر کا کہنا تھا کہ ادارہ نیوٹرل ہو رہا ہے تو ہمیں اسکی مدد کرنی چاہیئے، ادارہ نیوٹرل نہ ہوتا تو پرویز الہٰی اعتماد کا ووٹ نہ لے سکتے، اب فوج سیاست میں مداخلت نہ کرے، یہ قابل قبول نہیں ہوگا۔

اسلام ٹائمز۔ پیپلز پارٹی کے مرکزی رہنماء قمر زمان کائرہ نے کہا ہے کہ عمران خان کے آصف زرداری پر الزامات کا عدلیہ سوموٹو لے۔ اپنے ایک بیان میں وزیراعظم کے مشیر قمر زمان کائرہ نے کہا فواد چودھری کو چہرے پر کپڑا ڈال کر لے جانے کی مذمت کرتا ہوں، فواد چودھری ایسے لوگوں میں سے ہے، جو زبان سے مارتے ہیں، گولی کے دوچار چھرے لگنے پر عمران خان چار ماہ سے پلاسٹر لگائے بیٹھا ہے۔ انہوں نے مزید کہا کہ عمران خان ملک میں فاشسٹ نظام لانا چاہتا تھا، مانتا ہوں کہ ہم مہنگائی کم کرنے آئے، لیکن اس میں ناکام رہے، آج مہنگائی پہلے سے کہیں زیادہ بڑھ چکی ہے، عمران خان کے آئی ایم ایف سے کیے معاہدے پر عملدرآمد نہ کرتے تو ملک چھ ماہ پہلے ڈیفالٹ کر جاتا۔

قمر زمان کائرہ نے کہا کہ عمران خان اپنے منہ سے بولے تو ہم مذاکرات کرنے کو تیار ہیں، ان کو پاکستان کے لوگوں نے ووٹ دیئے، ہم کیا بھارت سے ووٹ لے کر آئے، عمران خان چاہتا ہے کہ بندے بھی میری مرضی کے، فیصلے بھی میری مرضی کے ہوں۔ وزیراعظم کے مشیر نے کہا کہ ادارہ نیوٹرل ہو رہا ہے تو ہمیں اس کی مدد کرنی چاہیئے، ادارہ نیوٹرل نہ ہوتا تو پرویز الہٰی اعتماد کا ووٹ نہ لے سکتے، اب فوج سیاست میں مداخلت نہ کرے، یہ قابل قبول نہیں ہوگا۔ انہوں نے مزید کہا وفاقی کابینہ و قیادت پر واضح کر دیا کہ عوام سے بہت کچھ لے لی، اب ان میں مزید کچھ دینے کی سکت نہیں، مشورہ ہے کہ اب ملک کے امراء سے پیسے لیکر عام آدمی کیلئے سہولیات پیدا کی جائیں۔