QR Code

جمہوریت کیخلاف کسی بھی غیرآئینی اقدام کی مزاحمت کریں گے، اسفند یار ولی

23 Nov 2011 20:30

اسلام ٹائمز:عوامی نیشنل پارٹی کے سربراہ کا پشاور میں منعقدہ تقریب سے خطاب کرتے ہوئے کہنا تھا کہ اے این پی اپنی سرزمین پرکسی بھی بیرونی جارحیت کا مقابلہ کرنے میں پیش پیش ہوگی، حکومتی رٹ تسلیم کرکے اپنی سرزمین دوسروں کے خلاف استعمال نہ کرنے کی ضمانت دینے والوں کے ساتھ مذاکرات کیلئے تیار ہیں۔

 اسلام ٹائمز۔ عوامی نیشنل پارٹی کے مرکزی صدر اسفند یار ولی نے کہا ہے کہ اے این پی اپنی سرزمین پر کسی بھی بیرونی جارحیت کا مقابلہ کرنے میں پیش پیش ہوگی، جمہوریت کے خلاف کسی بھی غیرآئینی اقدام کی مزاحمت کریں گے، حکومتی رٹ تسلیم کرکے اپنی سرزمین دوسروں کے خلاف استعمال نہ کرنے کی ضمانت دینے والوں کے ساتھ مذاکرات کیلئے تیار ہیں، انہوں نے ان خیالات کا اظہار عوامی نیشنل پارٹی کے صوبائی انتخابات مکمل ہونے کے بعداے این پی کے کونسلرز سے خطاب کرتے ہوئے کیا، خیبر پختونخوا کے وزیراعلیٰ امیر حیدر خان ہوتی نے بھی تقریب میں میں شرکت کی، اسفند یار ولی نے کہا کہ پاکستان کے تمام مسائل کا حل جمہوریت کے استحکام میں مضمر ہے، جمہوریت کے خاتمے کی غیرآئینی کوششوں کا مقابلہ کیا جائے گا اس ضمن میں خیبرپختونخوا کی صوبائی اسمبلی جمہوریت کے استحکام اور اس کے خلاف ہرقسم کے غیرآئینی اقدام کی مخالفت کے بارے میں قرارداد منظور کر چکی ہے جو پارٹی کے منشورکے مطابق ہے۔
انہوں نے مزید کہا کہ کراچی میں کوئی بھی قوت پختونوں کے کردار کو نظرانداز نہیں کرسکتی، آج وہاں پہلے کی نسبت پختون زیادہ مستحکم ہیں، انشاء اللہ آنے والے انتخابات میں باقی صوبوں کی طرح سندھ اسمبلی میں بھی اے این پی کی نمائندگی دوگنا ہوجائے گی، اسفند یار ولی نے کہا کہ ہر قیمت پر اپنے خطے کو امن کا گہوارہ بناکر رہیں گے، امن کے بغیر ترقی بے معنی ہے تاہم افغانستان اور پاکستان میں امن واستحکام ایک دوسرے کے ساتھ منسلک ہے، ضرورت اس امر کی ہے کہ افغانستان اور پاکستان مل جل کر امن کیلئے مشترکہ جدوجہد کریں اور پختون قوم کو دہشتگردی کے عذاب سے نجات دلائیں، انہوں نے کہا کہ اس وقت ہندوستان سمیت پوری دنیا میں کسی بھی وفاقی مملکت سے زیادہ صوبائی خودمختاری پاکستان میں موجود ہے۔

خبر کا کوڈ: 116614