اسلام ٹائمز - سانحہ کوہستان گلگت بلتستان کے لئے بہت بڑا المیہ ہے، پیر کرم علی شاہ

سانحہ کوہستان گلگت بلتستان کے لئے بہت بڑا المیہ ہے، پیر کرم علی شاہ

اسلام ٹائمز:علامہ سید راحت حسین الحسینی سے ملاقات کے موقع پر امامیہ مسجد میں میڈیا کے نمائندوں سے گفتگو کرتے ہوئے گورنر گلگت بلتستان نے کہا کہ عوام یک جان دو قلب ہوکر امن و اتحاد کا مظاہرہ کریں دلخراش واقعے میں ملوث مجرموں کی گرفتاری کے لئے تمام وسائل بروئے کار لائے جا رہے ہیں۔

اسلام ٹائمز۔ گورنر گلگت بلتستان پیر سید کرم علی شاہ نے مرکزی جامع امامیہ مسجد گلگت میں قائد ملت جعفریہ گلگت بلتستان علامہ سید راحت حسین الحسینی سے ملاقات کی اور سانحہ کوہستان میں جاں بحق ہونے والے افراد کے ایصال و ثواب کیلئے دعا کی۔ اس موقع پر انہوں نے میڈیا کے نمائندوں سے گفتگو کرتے ہوئے کہا کہ سانحہ کوہستان کا کوئی بھی نعم البدل ممکن نہیں ہے، انہوں نے کہا کہ سانحہ کوہستان میں جاں بحق ہونے والے افراد کے غم میں گلگت بلتستان کا ہر فرد برابر کا شریک ہے۔ انہوں نے اس المناک واقعے پر سید راحت حسین الحسینی سے تعزیت کرتے ہوئے کہا کہ سفاک قاتلوں نے درندگی کی انتہا کردی ہے، جس کی جتنی بھی مذمت کی جائے کم ہے۔

گورنر گلگت بلتستان نے کہا اس واقعے میں ملوث اصل محرکات کو سامنے لانے اور دہشت گردوں کی فوری گرفتاری کے لئے گورنر کے پاس جتنے بھی وسائل ہیں سب بروئے کار لائے جائینگے۔ انہوں نے کہا کہ آئندہ دنوں میں رحمان ملک گلگت آئینگے اور سانحہ کوہستان کے بارے میں اب تک ہونے والی تمام پیش رفت سے آ گاہ کرینگے۔