QR Code

بھارتی حکومت روپے کی قدر میں کمی کو روکنے کیلئے ہر ممکن کوشش کر رہی ہے، ریزرو بینک آف انڈیا

2 Jun 2012 23:04

اسلام ٹائمز: بینک کے ڈپٹی گورنر سوبیر گوکم نے کہا ہے کہ اگر ڈیزل کی قیمت بڑھائی جائے گی تو اس کے اثرات ضروریات زندگی کی اشیاء پر پڑیں گے۔

اسلام ٹائمز۔ ریزرو بینک آف انڈیا روپے کی قدر میں کمی کو روکنے کے لیے ہر ممکن کوشش کر رہا ہے، یہ بات بینک کے ڈپٹی گورنر سوبیر گوکم نے اخباری نمائندوں سے بات چیت کرتے ہوئے کہی، انہوں نے مزید کہا کہ عالمی اقتصادی مندی کے علاوہ داخلی مسائل سے روپیہ پر دباﺅ بڑھ گیا ہے، حکومت روپیہ کی قیمت میں استحکام لانے کے لیے کام کر رہی ہے، گوکم نے کہا کہ پچھلے دو سالوں کے دوران شرح سود میں جو اضافہ ہوا ہے یہ اسی کا نتیجہ ہے، انہوں نے امید ظاہر کی کہ ریزرو بینک سود کی شرح میں کمی کرکے پیداوار کو بڑھانے کے لیے راہ ہموار کرے گا، لیکن ساتھ ہی یہ بھی کہا کہ ہمیں یہ مان لینا چاہیے کہ شرح سود کی ہی وجہ سے پیدوار میں کمی نہیں ہوگی اس کے بھی بہت سارے عوامل ذمہ دار ہیں۔
 
انہوں نے کہا کہ حکومت اقتصادی حالات پر نظر رکھے ہوئے ہے اور اس کو صحیح سمت دینے کے لیے ہر ممکن اقدامات کئے جارہے ہیں، انہوں نے کہا کہ اگر ڈیزل کی قیمت میں اضافہ کیا جائے گا تو اس کے اثرات ضروریات زندگی کی اشیاء پر پڑیں گے لیکن انہوں نے ساتھ ہی یہ بھی کہا کہ قیمتوں میں اضافہ کی وجہ سے خسارے میں کمی آجائے گی۔

خبر کا کوڈ: 167651