QR Code

افغان جہاد میں حصہ لینے والوں کی فہرستیں دوبارہ تیار کرنے کا حکم

3 Mar 2013 16:10

اسلام ٹائمز:محکمہ داخلہ نے تمام اضلاع میں انٹیلی جنس اداروں کو ہدایات جاری کی ہیں کہ ماضی میں افغانستان سے تربیت لے کر آنے والے تمام افراد کی فہرستیں اپ ڈیٹ کر کے فوری طور پر ارسال کی جائیں۔

اسلام ٹائمز۔ حکومت نے ملک بھر میں افغانستان سے ٹریننگ حاصل کرنیوالے افراد کی ازسرنو رپورٹ مرتب کر کے ارسال کرنے کا حکم دے دیا ہے۔ ہوم ڈیپارٹمنٹ ذرائع کے مطابق حکومت نے پنجاب کے تمام شہروں جن میں جھنگ، لیہ، ڈی جی خان، ملتان، مظفر گڑھ، راجن پور، فیصل آباد، ٹوبہ ٹیک سنگھ، گوجرانوالہ، چنیوٹ، منڈی بہاؤالدین، حافظ آباد، سیالکوٹ، راولپنڈی، سرگودھا، خوشاب، میانوالی اور بھکر سمیت دیگر علاقے شامل ہیں میں افغانستان سے جہاد کی ٹریننگ حاصل کر کے آنیوالے افراد کی فہرستوں کا ازسرنو جائزہ لینے کے احکامات جاری کر دیئے ہیں۔ اس ضمن میں ڈسٹرکٹ انٹیلی جنس کمیٹیوں کو ہدایت کی گئی ہے کہ جن افراد کی طرف سے فہرستوں کے ناموں کے اخراج کیلئے درخواستیں دی گئی تھیں ان کی سرگرمیوں کی نگرانی کر کے تیارشدہ فہرستوں کو اپ ڈیٹ کر کے فوری طور پر رپورٹ ارسال کیا جائے۔

خبر کا کوڈ: 243887