اسلام ٹائمز - ضابطہ اخلاق ملی وحدت کی طرف سفر کا آغاز، اہل تشیع کی طاقت میں اضافہ ہوگا، علامہ عبدالحسین الحسینی

ضابطہ اخلاق ملی وحدت کی طرف سفر کا آغاز، اہل تشیع کی طاقت میں اضافہ ہوگا، علامہ عبدالحسین الحسینی

اسلام ٹائمز: ایم ڈبلیو ایم خیبر پختونخوا کے ڈپٹی سیکرٹری جنرل کا ’’اسلام ٹائمز‘‘ کیساتھ انٹرویو کے دوران کہنا تھا کہ علامہ عارف حسین الحسینی نے ہمیں یہ درس دیا ہے کہ جو اپنے آپ کو خاک سمجھے خداوند تعالٰی اس کا نام آسمانوں پر لکھتا ہے، اور جو اپنے آپ کو آسمان سمجھے، اس کو زمین بوس کرتا ہے۔

اسلام ٹائمز۔ مجلس وحدت مسلمین خیبر پختونخوا کے ڈپٹی سیکرٹری جنرل علامہ سید عبدالحسین الحسینی نے ضابطہ اخلاق کو ملی وحدت کی طرف سفر کا آغاز قرار دیتے ہوئے کہا ہے کہ اس عمل کی تکمیل سے پاکستان میں اہل تشیع کی طاقت میں اضافہ ہوگا۔ ان خیالات کا اظہار انہوں نے ’’اسلام ٹائمز‘‘ کیساتھ خصوصی انٹرویو کے دوران کیا۔ ان کا کہنا تھا کہ اقوال زریں میں سے ہے کہ ‘‘اتحاد میں زندگی ہے اور اتفاق میں برکت ہے۔’’ اس میں کوئی شک و شبہ کی بات نہیں ہے کہ ہمیں اس وقت سب سے زیادہ اتحاد و وحدت کی ضرورت ہے۔ اگر ہم اپنی اناں کو چھوڑیں، اگر ہم اپنے شخصی مفادات کو چھوڑ دیں، قوم، ملت اور مذہب کیلئے کام کریں تو کوئی بعید نہیں کہ ہم کامیابی سے ہمکنار نہ ہوں۔ تاہم انہوں نے کہا کہ آدمی کے اندر جب یہ بات ضم ہوجائے کہ جو ہوں وہ میں ہی ہوں، اور دوسرا آدمی کوئی آدمی ہی نہیں ہے، تو وہ اس دنیا میں بھی ذلیل ہے اور اس دنیا میں بھی خوار ہوگا۔

ان کا کہنا تھا کہ 11 گناہ کبیرہ ہیں، میں یہ دعوے سے کہتا ہوں کہ آپ نے کبھی بھی اسٹیج سے یہ بات نہیں سنی ہوگی کہ گناہ کبیرہ میں ایک گناہ قطع رحمی ہے، یعنی تعلقات کو منقطع کرنا۔ اگر ہم قطع رحمی کو چھوڑ کر صلح رحمی کو اپنائیں تو میں یقین سے کہہ سکتا ہوں کہ ہم اس دنیا میں بھی کامیاب ہیں اور اس دنیا میں بھی کامیاب رہیں گے۔ لہذا اتحاد ہونا چاہئے، اتفاق ہونا چاہے۔ علامہ عبدالحسین نے مزید کہا کہ ہم تو خاکسار ذہن کے مالک ہیں۔ علامہ عارف حسین الحسینی نے ہمیں یہ درس دیا ہے کہ جو اپنے آپ کو خاک سمجھے خداوند تعالٰی اس کا نام آسمانوں پر لکھتا ہے، اور جو اپنے آپ کو آسمان سمجھے، اس کو زمین بوس کرتا ہے۔ انہوں نے ضابطہ اخلاق کو خوش آئند قرار دہتے ہوئے کہا کہ یہ اقدام ملت تشیع کی وحدت کی طرف سفر کا آغاز ہے۔ مجلس وحدت مسلمین کی جانب سے علامہ ناصر عباس جعفری نے ضابطہ اخلاق پر دستخط کر دیئے ہیں۔ اس کی تکمیل سے پاکستان میں اہل تشیع کی طاقت میں اضافہ ہوگا۔