QR Code

الطاف حسین کے بیان پر سیاسی قیادت کی گائیڈ لائن کا انتظار ہے، اعزاز چوہدری

16 May 2013 19:31

اسلام ٹائمز: دفتر خارجہ کے ترجمان کا کہنا تھا کہ دنیا بھر میں پاکستان کے کنٹریکٹ یا نان کیریئر سفراء کی تعداد 15 ہے، ان سفیروں کے مستقبل کا فیصلہ نئی منتخب حکومت ہی کرسکتی ہے۔

اسلام ٹائمز۔ ترجمان دفتر خارجہ کا کہنا ہے کہ الطاف حسین کے حالیہ بیان پر برطانوی حکومت سے پاکستان کے رابطے کا انہیں علم نہیں۔ دفتر خارجہ کو اس بارے میں سیاسی قیادت کی گائیڈ لائن کا انتظار ہے۔ بھارت سے جامع مذاکرات یا بات چیت کیلئے کوئی نیا رابطہ نہیں ہوا۔ اسلام آباد میں ہفتہ وار نیوز بریفنگ کے دوران ترجمان دفتر خارجہ اعزاز چوہدری نے کہا کہ دفتر خارجہ نے الطاف حسین کے بیانات کو دیکھا اور سنا ہے۔ دفتر خارجہ کے مؤقف اور پوزیشن سے میڈیا کو آگاہ نہیں کرسکتا۔ اس حوالے سے سیاسی رہنمائوں کی گائیڈ لائن کا انتظار ہے۔ سیاسی قیادت کی پوزیشن واضح ہونے کے بعد ہی کوئی بیان دے سکتے ہیں۔ انہوں نے کہا کہ پاک بھارت جامع مذاکرات کی بحالی کیلئے کوئی نیا رابطہ نہیں ہوا۔ امید ہے کہ مستقبل قریب میں پاک بھارت تعلقات مثبت انداز سے آگے بڑھیں گے۔ ترجمان دفتر خارجہ نے بتایا کہ دنیا بھر میں پاکستان کے کنٹریکٹ یا نان کیریئر سفراء کی تعداد 15 ہے، ان سفیروں کے مستقبل کا فیصلہ نئی منتخب حکومت ہی کرسکتی ہے۔ ہمارے پاس ان سفیروں کے مستقبل کے حوالے سے کوئی اطلاع نہیں۔ اعزاز چوہدری نے کہا کہ پاکستان نے بار بار پاک افغان سرحد پر موثر مینجمنٹ کا مطالبہ کیا ہے۔ سرحد محفوظ بنا کر ہی بارڈر کراسنگ اور فائرنگ کے واقعات کم ہوسکتے ہیں۔

خبر کا کوڈ: 264584