QR Code
علامہ خرم قادری کے قاتل گرفتار نہ ہوئے تو احتجاج کی کال دینگے، سنی اتحاد کونسل
20 May 2013 20:39
اسلام ٹائمز:رہنماؤں کا کہنا ہے کہ کراچی اور بلوچستان کے بعد لاہور میں علمائے اہلسنّت کی ٹارگٹ کلنگ ناقابل برداشت ہے اور پاکستان بنانے والوں کی اولاد کا قتل لمحۂ فکریہ ہے، اہلسنّت کو پرامن اور محب وطن ہونے کی سزا دی جا رہی ہے۔
اسلام ٹائمز۔ سنی اتحاد کونسل پاکستان کے راہنماؤں صاحبزادہ حامد رضا، حاجی محمد حنیف طیب، پیر محمد اطہر القادری، پیر سیّد محمد اقبال شاہ، پیر فضیل عیاض قاسمی، طارق محبوب، محمد نواز کھرل، مفتی محمد سعید رضوی، مفتی محمد حسیب قادری، صاحبزادہ عمار سعید سلیمانی، علامہ نواز بشیر جلالی اور صاحبزادہ سیّد صابر گردیزی نے اپنے بیان میں کہا ہے کہ علامہ خرم رضا قادری شہید کے قاتل گرفتار نہ ہوئے تو ملک گیر احتجاج کی کال دیں گے۔
کراچی اور بلوچستان کے بعد لاہور میں علمائے اہلسنّت کی ٹارگٹ کلنگ ناقابل برداشت ہے اور پاکستان بنانے والوں کی اولاد کا قتل لمحۂ فکریہ ہے۔ اہلسنّت کو پرامن اور محب وطن ہونے کی سزا دی جا رہی ہے۔ نگران حکومت علامہ خرم رضا قادری کے قاتلوں کی گرفتاری کے لیے تمام ریاستی وسائل استعمال میں لائے۔ علامہ خرم رضا قادری کے قاتلوں کی عدم گرفتاری سے اہلسنّت میں سخت اضطراب اور تشویش پائی جاتی ہے۔ قاتل گرفتار نہ ہوئے تو پرامن اہلسنّت سڑکوں پر نکل کر شدید احتجاج پر مجبور ہوں گے۔
خبر کا کوڈ: 265874