QR Code

چمن, ریلوے اسٹیشن پر دھماکے میں 2 افراد جاں بحق

21 Aug 2013 16:47

اسلام ٹائمز: پاکستان کے صوبہ بلوچستان کے شہر چمن کے ٹکٹ گھر کے قریب ریلوے اسٹیشن پر بم دھماکے کے نتیجے میں 2 افراد جاں بحق جبکہ متعدد زخمی ہوگئے ہیں۔

اسلام ٹائمز۔ پولیس کے مطابق چمن سے کوئٹہ آنے والی چمن پسنجر ٹرین روانگی سے چند منٹ قبل ٹکٹ گھر کے قریب زوردار دھماکہ ہوا۔ دھماکے سے کئی گاڑیوں کو بھی نقصان پہنچا جبکہ تمام زخمیوں کو سول ہسپتال چمن منتقل کردیا گیا جہاں فوری طور پر ایمرجینسی نافذ کردیا گئی ہے۔ ڈپٹی کمشنر چمن کے مطابق دھماکہ خیز مواد موٹر سائیکل میں نصب کیا گیا تھا جسے ریمورٹ کنٹرول کے زریعے اڑایا گیا دھماکے کے بعد پاک افغان سرحد کو بند کردیا گیا جسکے باعث دونوں جانب سے آمد و رفت معطل ہوگئی جبکہ کوئٹہ چمن پسنجر ٹرین کو منسوخ کردیا گیا۔

یاد رہے کہ بلوچستان کے صوبے میں چمن، ضلع قلعہ عبداللہ کی ایک تحصیل ہے۔ یہ افغانستان کی سرحد کے قریب واقع ہے۔ مرکزی شہر چمن ہی کہلاتا ہے جو تجارت، اسمگلنگ اور افغان مہاجرین کے بے شمار تعداد کی وجہ سے مشہور ہو گیا ہے۔ اس کے بالکل قریب افغانستان کی سرحد کے اُس پار افغانستان کے صوبہ قندھار کا قصبہ سپن بولدک واقع ہے۔

خبر کا کوڈ: 294542