QR Code

روس اور امریکہ کے درمیان شام کے معاملے پر مذاکرات آج بھی جاری رہینگے

امریکہ شام سے متعلق نئی قرارداد میں فوجی حملے کی بات نہیں کریگا، امریکی عہدیدار

14 Sep 2013 15:28

اسلام ٹائمز: غیر ملکی خبر ایجنسی کے مطابق واشنگٹن میں اوباما انتظامیہ کے سینئر عہدیدار نے انکشاف کیا ہے کہ روس کی مخالفت کی وجہ سے امریکہ اقوام متحدہ میں پیش کی جانیوالی نئی قرارداد کے مسودے میں شام کے خلاف فوجی کارروائی کا ذکر نہیں کریگا۔

اسلام ٹائمز۔ امریکہ شام سے متعلق اقوام متحدہ کی نئی قرارداد میں فوجی کارروائی کا ذکر نہیں کریگا جبکہ روس اور امریکہ کے درمیان شام کے معاملے پر جنیوا میں مذاکرات آج بھی جاری رہیں گے۔ غیر ملکی خبر ایجنسی کے مطابق واشنگٹن میں اوباما انتظامیہ کے سینئر عہدیدار نے انکشاف کیا ہے کہ روس کی مخالفت کی وجہ سے امریکہ اقوام متحدہ میں پیش کی جانیوالی نئی قرارداد کے مسودے میں شام کے خلاف فوجی کارروائی کا ذکر نہیں کرے گا۔ ان کا کہنا ہے کہ قرارداد میں دمشق کے کیمیائی ہتھیاروں کے خلاف سخت اقدامات تجویز کئے جائیں گے، شام نے اگر اپنے کیمیاوی ہتھیاروں کی تصدیق کو مسترد کیا تو اس پر پابندیوں میں اضافہ کیا جائیگا۔ امریکہ چاہتا ہے کہ شام کو کیمیائی ہتھیاروں سے غیر مسلح کرنے کا کام آئندہ چند ہفتوں میں ہو جائے۔ دوسری جانب جنیوا میں امریکی وزیر خارجہ جان کیری اور ان کے روسی ہم منصب سرگئی لاروف کے درمیان شام کے معاملے پر مذاکرات آج بھی جاری رہیں گے۔

خبر کا کوڈ: 301703