QR Code

حق خودارادیت کے حصول تک جدوجہد جاری رکھیں گے، چوہدری مجید

20 Sep 2013 11:56

اسلام ٹائمز: مظفرآباد میں میڈیا کے نمائندوں سے گفتگو کرتے ہوئے وزیراعظم آزاد ریاست کا کہنا تھا کہ مقبوضہ کشمیر میں آل پارٹیز کے بینر تلے چلنے والی تحریک کامیابی سے ہمکنار ہوگی۔

اسلام ٹائمز۔ وزیراعظم آزاد کشمیر چوہدری عبدالمجید نے آل پارٹیز حریت کانفرنس مقبوضہ کشمیر کی طرف سے 20 اور 21 ستمبر کو مقبوضہ کشمیر میں مسلسل کرفیو کے نفاذ، حریت قیادت کی نظربندی اور کشمیریوں کی منطم نسل کشی پر بھارت کے خلاف احتجاج کی کال کی بھرپور حمایت اور مقبوضہ کشمیر کے عوام سے مکمل یکجہتی کا اظہار کرتے ہوئے بین الاقوامی برادری کی مہذب اقوام سے اپیل کی وہ مقبوضہ کشمیر میں بھارتی قابض فوج کے ہاتھوں انسانی حقوق کی سنگین پامالیان بند کرائے اور بھارت پر سیاسی دبائو بڑھائے کہ وہ بین الاقوامی طور پر تسلیم شدہ حق استصواب رائے کے ذریعے کشمیریوں کو دے۔ انھوں نے بھارت سے کہا کہ وہ مسئلہ کشمیر کے حل کے حوالے سے تاخیرے حربے ترک کرے اور مقبوضہ کشمیر کے زمینی حقائق کو تسلیم کرتے ہوئے کشمیریوں کو استصاب رائے کا حق دے۔ وزیراعظم نے کہا کہ کشمیری عوام کے حق خودارادیت کی تحریک کو طاقت ذریعے سرد کرنے کے تمام ہتھکنڈے ناکام ہوں گے۔ کشمیری عوام یہ حق حاصل کر کے رہیں گے۔ ان خیالات کا اظہار انھوں نے مظفرآباد میں میڈیا کے نمائندوں سے گفتگو کرتے ہوئے کیا۔ 

چوہدری مجید نے کہا کہ آزاد خطہ کی حکومت اور عوام مقبوضہ کشمیر کے عوام کے شانہ بشانہ کھڑے ہیں اور ان کے حق خودارادیت کی جدوجہد کی کامیابی تک ہر بین الاقوامی فورم پر آواز بلند کرتے رہیں گے۔ انھوں نے کہاکہ مقبوضہ کشمیر میں آل پارٹیز کے بینر تلے چلنے والی تحریک کامیابی سے ہمکنار ہوگی۔ انھوں نے کہا کہ تحریک آزادی کے بیس کیمپ کی حکومت آل پارٹیز حریت کانفرنس کی ڈیکٹیشن پر چل رہی ہے۔ مقبوضہ کشمیر کے عوام ہمارے وجود کا حصہ ہیں۔

خبر کا کوڈ: 303539